محمد علي الامي: هواك وهواي

هواك و هواى

هواك وهواى بى جاروا وسبن أفكارى نظراتك
أحب تعطف تزيل وجدى واحب كل البحب ذاتك
أحب لونك بحب نورك بحب يا حبيبى نفحاتك
أحب فيك خدك الزهرى وأخاف ترمينى لمحاتك

أحب قربك أخاف بعدك..أشوفك بين دوحاتك
أخاف صدك بخاف جورك واحب تتهنى بحياتك
أحبك حبى للعافية وكمان يا سيدى وحياتك
أحب فيك الحيا الفطرى و يذوب من حالى صيحاتك
إذا في حبكم ضعت اذا أُقبر في ساحاتك
أكون للحظ دوام شاكر وأقبِل أنت راحاتك

أحب أنظر جمال محياك وأخاف تسحرنى بسماتك
وأخاف لحظك يجرحنى واحب تسكرنى بسماتك
وأحب طيفك يأنسنى واحب تسمعنى نغماتك
وأخاف هجرك يطول بى و أخاف تحرمنى كلماتك

يا منعم يا فريد عصرك سعيد وسعيده ساعاتك
منزه يا رشيق صافى عفافك ملى ما فاتك
بديع و وديع مثال رقة حشيم ورينى وصفاتك
أسرت فؤادى يا ظالم و دمى خضب في كفاتك

وكب يا دمعى في سيلان وزيد يا صدرى زفراتك
حبيبك ودعك راحل و زيد يا طرفى عبراتك
حمام الأيك حن مره تعال أسمعنى نبراتك
طريت أم در مقر أهلى زمانى و كفاى عباراتك