حسين بازرعه: قصتنا

قصتنا

بالمعزة

بالمودة البينا بي أغلى الصلات

بالهوى العشناه بي أعصابنا

خمسة سنين ومات

بالعذاب الشفتو

والسر الكتمتو

وباقي الطيبات

استحلفك أترك سبيلي

وسيبني وحدي

أقاسي وأبكي مر الذكريات

أنا بي حناني الغالي خصيتك

وحبيتك بكل جوارحي

وعواطفي العميقة

أنا شلت من أجلك هموم الدنيا

قاسيت من جراحها وكل ضيقها

لسعادتك إنت كم ضحيت وإتغربت

ما خليت طريقة

وفي مسيري المضني من أجل الحقيقة

كل طائر مرتحل

عبر البحر

قاصد الأهل

حملتو أشواقي الدفيقة

ليك ياحبيبي للوطن

لي ترابه .. لي شطآنه

للدار الوريقة

لكن حنانك لي

أو حتي مشاعرك نحوي

ما كانت حقيقة

كانت وهم ...

كانت دموع

مسفوحة بي أحرف أنيقة

ما بي إيدي

لو ضباب الغيرة

أعماني وزيف لي الحقيقة

إنت نبع حناني

إنت كياني

إنت الدنيا

بهجتها وشروقها

وإن حصل زلت خطايا معاك

أو ضلت طريقها

هل تصدق تنـتهي قصتنا

يا أجمل حقيقة

نحن عشناها بدموعنا

وبالضنى في كل دقيقة

ياحبيبي

لم تزل قصتنا

قصة حب أقوى من الحقيقة