رواية باب الريح - طارق اللبيب . للكبار فقط ..
من الروايات الحساسه ..
جدا لمعالجتها بعض القضايا المسكوت عنها في المجتمع ..
قسمت الرواية لثلاث اجزاء ..
كل جزء يحتوي على عشرة فصول ..
اتمنى لكم الاستمتاع والاستفادة من اهدافي..
الجـــــــزء الاول
......
بسم الله الرحمن الرحيم ..
هذه الرواية من القصص التي تشيب لها النواصي ..
وتحتار عندها الافهام ..
ومن تابعها سيدري ماأقول ..
لكم التحية طارق اللبيب ..
رواية .باب الريح.
الحلقة الاولى ..
شفت يا فيصل البنية القبيل جات وقفت قدام الكشك ؟
ده صلاح بتكلم مع صاحبو فيصل .. الاتنين في السنة الاخيرة من الجامعة ..
فيصل قاليهو اي والله .. ماشاء الله تبارك الله ..
صلاح قال والله انا اربعة سنة في الجامعة دي مافي واحدة جابت لي فرت قلب الا البنية دي ..
تتخيل ملامحها مألوفة لدي لدرجة ماتتصورها ..كاني بعرفها من الطفولة . مع اني متأكد بما لايدع مجالا" للشك اني
اول مرة اشوفها .مختار الله في حكمو .
فيصل قال ليهو عارف ياصلاح قالو الزول البحس احساس زي ده تجاه اي انسان
معناها الزول ده حتربطو بيهو علاقة ابدية ..
صلاح قاليهو .. عليك الله يا فيصل ماتعشمنا ساي تخلينا نمشي نسرح مع الافكار انا وراي امتحانات ..مختار الله في
حكمو ..
فيصل قاليهو هاك الاحلام دي ههه ياود اتلم زي دي انت مابتطولا ..برالمة يامعلم ..
صلاح قاليهو انا زاتي قلت كدا ههههه
واتفرقوا على كدا ..
صورة البت ماراضية تفارق مخيلة صلاح طيلة اليوم
ويتخيل في طريقة وقفتها وحركات يدها في الكلام واستمر الموضوع يومين تلاتة ومستمر في زياده مطردة ..
في واحدة في صف ناس صلاح من البنات البتكون خوتها مع الاولاد اكتر من البنات .. اسمها سارة عاملة فيها شفاتية
كدا النوع البكفكف يدين القميص ..
عندها علاقة طيبة وخوة شديدة مع صلاح ..
لاقاها الصباح قال ليها يا سارة عايزك في موضوع .
عايزك تجيبي لي تقرير كامل عن البت الفلانية دي ..
قالت ليهو ماتشيل هم بكرة اخر اليوم يكون معاك تقرير مفصل هه..
بي اختصار بكرة سارة جابت ليهو الخبر ..
قالت ليهو دي يا صلاح اسمها ناهد ابوها مغترب في السعودية عندها اخويين صغار
كانو في مقيمين هناك بس هسي الام جابت اولادها وجات سكنت هنا عشان تتابع دراسة اولادها ..
البت دي يا صلاح جميلة وانيقة ونضيفة بس مشتته وعندها حبة تسرع وكلامها كتير تاني ماعندها العوجة ..
قاليها دي بسيطة كلكن يابنات حواء الحاجات ديل عندكم ..
طيب يا سارة طبعا" انتي عارفاني انا اكتر زول بخجل من البنات
وانتي لو ما كنتي حربية انا مابقدر اتكلم معاك فعايز منك حاجة واحدة
عايزك تربطيني بيها بخيط تواصل رايك شنو ؟
قالت ليهو مافي مشكلة ..
اها بكرة سارة دي مشت تتكلم مع ناهد ..
ناهد قاطعتها قالت ليها اسمعي ياسرو انا والله بعزك شديد..
بس واحد ضعيف الشخصية وبرسل البنات ومابقدر يواجه بي نفسه ويتكلم معاي مباشر .زي ده مابلزمني ..
عليك الله اصرفيهو مني كدا ولا كدا ..
قالت ليها انتي على الاقل شوفيهو والله زول قمة الروعة بس خجول
لكن جواهو نضيف لدرجة وبرئ برئ براءة الاطفال ..
والله لو قال عايزني انا ما أتلفت ..
قالت ليها طيب خلاص امشي ربطي انتي لروحك معاهو سيبيني في حالي ..
الموضوع ده انا مالافق معاي ماتحاولي ..
قالت ليها عليك الله ماتخيبي ظني بس شوفيهو واتعرفي عليهو لو مانفع معاك
انتي تاني حره ..
قالت لا .. ثم لا.. وده كلام نهائي انا ماعايزة اشغل روحي بموضوع
من بداية الجامعة ..
سارة فاتت منها بي ظن خائب وروح منكسرة ..
لكن سارة مشت وبتتكلم مع روحها قالت : كويس يا مفتريه .انا لو ما رميتك في حبالو ما ابقى اسمي سارة وفاتت
تدبر خطة ..
والخطة كانت كالاتي ..
رجعت سارة لصلاح وقالت ليهو البت دي ماعندها اي مانع وانا اتكلمت معاها وقالت متشوقة لي لقياك وهي
بتحب الزول الببادر .. امشي طوالي وعبر ليها عن اعجابك وموضوعك ده جاهز بس حضر لي البخشيش..
تتخيلو سارة دي غلطت ولا اتصرفت صح؟
.............................................................
باب الريح . 2
بعد سارة كلمت صلاح ..
طبعا فرح فرح شديد خلاص ..
وقالها خلاص بكرة بلاقيها هسي حالتي العامة لاتسمح ..
مختار الله في حكمو..
وبكرة الزول جا لابس لبس خطير ومشيك شياكة غريبة ..
حتى ناس المحاضرة لاحظو .. في اخر اليوم بعد عرف مواعيد طلعتها انتظرها
قبل ماتطلع كورك ليها ياناهد ياناهد .. اتلفتت علية وقالت ليهو:
افندم ..
قاليها انا صلاح عايزك في كلمتين بس وما بأخرك ..
قالت للبنات المعاهة اتقدمو انا بجيكم جنب المكتبة ..
قالن ليها اخدي راحتك ماورانا حاجة ..
المهم جات عليهو ومشى معاها كدا مسافة لقو ليهم كرسي اسمنتي قعدت في طرف وهو قعد في طرف بعيد ..
ويدعك في ايديهو ومدنقر ويتبسم والايدين عرقن ..
وهي تعاين ليهو بكل قوة وحدة نظر {غايتو }..
قال ليها في الحقيقة طبعا انا رسلت ليك سارة عشان ........
ماخلته يتم كلامو قالت ليهو .. وليه ترسلا لي انت مابتعرف تتكلم؟
قال ليها الحقيقة انا زول خجول بطبعي ..
قالت ليهو طيب وبعد رسلتها .. وصلت ليك الرد وللا لا؟
قال ليها وصلت لي الرد وعشان كدا انا جيت الاقيك ..
قالت ليهو ورغم الكلام الوصل ليك مني برضو مصر تلاقيني ..
قال ليها الكلام الوصل منك هو الخلاني اتحفز واتشجع الاقيك ..
قالت ليهو .. اها انا سامعاك قول العندك انا مستعجلة ..
قال ليها .. والله بس انا معجب بيك وعايز اعبر ليك عن اعجابي ..
قالت ليهو .. اها مفهوم وتاني؟
قال ليها تاني مافي حاجة انت ليه قاسية معاي كدا وطبعك حاد..
كدا حتى لو عندي باقي كلام مابقدر اقولو ..
قالت ليهو عشان الزيك ديل انا لازم اقطع معاهم جاف ..
قال ليها ليه في شنو؟ وانا مالي عملت حاجة غلط لاسمح الله..
قالت ليهو بالرغم من اني انا قلت ماعايزة اشوفك ولا الاقيك
انت مصر تلاقيني معناها شنو؟؟؟.. افهم شنو غير انك انسان ردي ودمك بارد..
او يكون عندك نية ما راكبة عدلا..
قال ليها معقول انتي قلتي كدا ؟؟قلتي ماعايزة تلاقيني ؟؟؟ ..
انا لو عارف كدا ماكنت لاقيتك ..بس والله سارة قالت انك اتقبلتي الموضوع وعايزة تلاقيني ..
قالت ليهو سارة كذابة امشي ناديها لي ..
قال ليها على العموم انا اسف وشكلي خشيت غلط واتصرفت غلط من البداية..
والعترة بتصلح المشية مختار الله في حكمو ..
مع السلامة واسف على التاخير والازعاج ..
وقام مشى طوالي محرج احراج قرب يبكي ..
مشى لاقى فيصل وحكى ليهو المشهد ..
فيصل قال ليهو ياخي انا ماقلت ليك المسكنة دي بتضيعك ..
البنات ديل المسكين بلعبن بيهو كورة خليك زول مفتح .. ومر مرارة الحنضل ..
قاليهو انت ماعارف انا مع الرجال كيف ؟؟ ..
لكن والله البنات ديل بحترمهم احترام غريب ..
فيصل قاليهو ما أهو ده المحيرني .. تطقطقنا نحن وتهرشنا ..
تلاقيك بت تقعد تتكبكب ..
صلاح قاليهو تفتكر ده من شنو ؟
قال ليهو حالة نفسيه هههههه .. يلزمك دكتور نفسي ..
صلاح قال ليهو : مختار الله في حكمو ..
والله انا هسي مستاء استياء شديد خلاص ومحبط احباط ماتتخيله
وندمت ندامة البحر مايغسلها .. لكن كويس انا تاني ماعندي اي كلام مع بت
بعد ماقلت اكسر الحاجز واشوف حياتي .. شوف الحصل علي..
هناك طبعا ..ناهد مشت حكت لي صاحباتها المعاها كل القصة
نسرين صاحبتها بتقرا في تالتة قالت ليها..
صلاح ده انا بعرفو وساكن في حلتنا ده زول ممتاز ومهذب وصلواته في مواعيدها ..
وماعنده اي علاقات مع البنات ..
طيلة السنوات الفاتت في الجامعة مافي واحدة قدرت تخترق سياجه ..
عامل حول نفسه حالة من الاحترام الغريب والبنات كلهن فشلن في الوصول اليه
دي معجزة كونه اتكلم معاك .. بعدين زول حساس شديد يعني يا ناهد الزول ده احتمال الليلة يمرض عديل ؟ ولا
يعمل مصيبة في روحه ..
انتي ليه بتتكلمي مع الزول كلام زي ده لمجرد انو قال معجب بيك
وليه تتسرعي وتحكمي على الناس
بعدين انتي لو ماعايزاهو كان ممكن تردي بي رد احسن من كدا.
انتي لو عارفة صلاح ده شنو والله انتي المفروض تسكيهو مش هو اليجيك ..
غايتو غبيه .. فرصة وضاعت منك فرصة تتمناها اي بت .. سبحان الله هو منو الزي صلاح ؟؟ -ده كلو كلام نسرين-
المهم ناهد ندمت وضميرها انبها وبقت ما مرتاحة كلو كلو
واليوم كلو كل شوية تتخيل صورته هو ساكت وبعاين ليها مبهوت..وهي بتتكلم !!
وتتخيل في سوء كلماتها الكان بتقول فيها وهو ساكت .. وتترد كلمته بصداها في قلبها ..((والله بس انا معجب بيك
وعايز اعبر ليك عن اعجابي ..)) وكيف كانت ردودها جافة ومحرجه ..
وقررت انها تحاول تصلح الغلط ده لكن كيف ماعارفة .. لانها عارفة حيكون غضبان ومغلول من جواهو ..
وخجلانة من روحها لانها تصورت انو شخصية .. وهسي ظهر انو شخصية تانية خالص ..المهم قالت في نفسها انا
قررت أعمل حاجة وح استحمل نتيجتها
................................................................
باب الريح .. 3
عدت ناهد اليوم في اسوء حالة ندم ممكن الواحد يتخيلا . وبكرة طوالي عشان تتخلص من الموضوع ده قررت
تعتذر لي صلاح .
بس طبعا" هي عندها عزة نفس غريبة . فخايفة انه صلاح يقوم يحرجها ويبهدلا . ومترددة وماعارفة تعمل شنو .
المهم قالت انا اصبر لغاية نهاية اليوم اشوف البحصل شنو؟
لاقت فيصل وسلم عليها وقال ليها :.
انتي زولة مفترية وشايفة روحك اكتر من اللازم. انتي شايفة نفسك شنو؟
قايلة نفسك منو يعني؟ .. بتقتري بالطريقة دي .. احرجتي الزول ده بالطريقة دي .. حرام عليك يا مخلوقة ..
قالت ليهو والله كلامك صاح انا ماكان اتسرع بس والله انا هسي ندمانة وماعارفة اعتذر ليهو كيف ..
قال ليها .. انتي متأكدة من الكلام ده ..؟ قالت ليهو اي والله ياريت لو تشوف لي طريقة ..
انا خايفة اوصيك ليهو .. يلقاها فرصة ويرد علي بنفس الكلام القلتو ليهو ويقول لي ليه توسطي لي زول
وصراحة خجلانة وماقادرة اواجهو ..
فيصل سكت مسااااافه وقال ليها كان كدي فعلا انتي زولة كويسة وماتشيلي هم انا بتصرف ..
مشى يفتش لي صلاح ..
لقاهو قاعد مستاء ..
قال ليهو انا جاييك بي بشارة مبالغة .
قال ليهو قوووووول يافيصل ..
حكا ليهو كل الحصل بالتفصيل ..
صلاح قال ليهو . انت زول مابتفهم ..
ليه تقول ليها كدا .. هي ماغلطانة ..
فيصل قال ليهو كيف ماغلطانة يا ابو الفهيم ..؟؟؟؟
قال ليهو : اول حاجة مفهوم عن شباب اليومين دي نواياهم سيئة ودايما بتقربوا للبنات لاغراض سيئة .. والزول
النيتو صادقة وهدفو شريف نادر
نادر ..فكونها تتوقع توقع زي ده .. يتخيل لي ده موضوع طبيعي .. ثم ثانيا .. انا كوني اوسط ليها سارة ده تصرف
مني سيء يستحق اني
اخد فيهو الحق والزايد .. ثم ثالثا" كونها تقول ماعايزاني وانا اصر على اني الاقيها ده برضو داعي كبير للانفعال لانو
سارة كذبت فالغلط هنا غلط سارة ماغلطها هي ...
فالمفروض انت قبل ماتتهجم عليها تفكر من وجهة نظرها هي قبل ماتفكر في الاحراج الحصل لي.
بعدين في النهاية هي بنت .. ومن حقها تحمي نفسها بشتى السبل والوسايل فكونها تتصرف تصرف زي ده انا
يتخيل لي شي
طبيعي لانها بتفتكر انها بالطريقة دي بتعمل حماية صلبة لنفسها .. في النهاية هي معذورة وللا لا..؟؟
فيصل فاتح خشمو ومطير عينيهو ويعاين ليهو ..
قال ليهو والله انت المفروض تشتغل في السياسة ..او تكون محامي او مصيبة ..
ياخي انت بتمنطق المواضيع بطريقة مقنعة شديد .. اكيد اكيد كلامك صح ..
ياخي هسي ندمتني على الكلام القلتو ليها ..
بس هسي هسي ندمانة وماقادرة تسوي اي شي .. الحل شنو ونتصرف كيف ؟ ؟؟صلاح قال ليهو هي هسي وين ؟
قال ليهو وراء القاعة الفلانية مع الشلة بتاعتها ..
طوالي صلاح مشى عليها وناداها وقال ليها ..
اسمعي فيصل كلمني بالحصل والحوار الدار بينك وبينه
اولا انا بعتذر عن الكلام القالو ليك لانك انتي ماغلطانة ابدا .. وكل الكلام الوجهتيهو لي كنتي محقة
وانا مازعلان منك بس زعلان من سارة .. لانها كذبت بس ما ح اسألها عشان نيتها طيبة وقاصدة الخير .قالت ليهو
كيف قاصدة الخير ..؟
قال ليها طبعا انتي لمن قلتي ليها انا ماعايزاهو ومايقابلني هي من وجهة نظرها انك حكمتي على انسان قبل
ماتشوفيهو
ومافي طريقة تخلينا نتقابل الا تكذب .. يعني هسي لو قالت لي الكلام الصحيح انا ماكنت لاقيتك ولا اتكلمت معاك
صح؟ قالت ليهو صح..
قالها : فكونو نتقابل حتى ولو عن طريق سوء التفاهم دي بتخلينا نعرف بعضنا اكتر وكيفية تناولنا للمشكلة
بجوانيها
فهي عملت كويس هسي انا عرفتك تمام انتي شنو وكيفية تعاملك مع الامور وانتي عرفتيني ..
يعني هسي بقينا على بينة .. فانا بعتبرها نجحت الى حد ما في هدفها .. فماتزعلي منها هي قصدها طيب ..
ومرات الكضب للمصلحة بكون حسنات .. صح؟
قالت ليهو اكيد ؟ وقعدت تعاين ليهو مبهوتة .. ومستغربة في العقلية الجبارة والنفس النقية البتمتع بيها الانسان
ده ..
قال ليها وابشرك من اليوم وتاني مش ح اضايقك ابدا" .. وربنا يوفقك مع السلامة ..
ومشى منها والموضوع انتهى على كدا ..
بعد اخد خطوات نادته وقالت ليهو دقيقة ياصلاح.
.........................................................................
باب الريح
4·
تم امن ناهد كوركت لي صلاح جاها راجع قالت ليهو ممكن القى فرصة تانيه اتكلم معاك ؟؟ قال ليها ممكن بس
بخصوص شنو؟ قالت ليهو . تكمل لي الكلام البديتو لي .. قال ليها انا اصلا كلامي كملته هو عبارة عن تعبير عن
الاعجاب ليس الا . قالت ليهو . وهسي الاعجاب راح ولا موجود؟؟قال ليها صراحة . الحاجات الزي دي المجامله فيها
ما بتنفع انا حاسي بانو مشاعري مازي يوم جيتك .. بس والله ما بحمل ليك جواي الا كل خير واحترام ..قالت ليهو
خلاص ياصلاح انت اخد فرصة يومين تلانه وشوف نغسك لو اعجابك رجع زي ماكان انا منتظراكولو ما رجع دي
قسمتي كدا وانا راصيه بيها.قال ليها اتفقنا ان شاء الله وعدا يوم واتنين وعشرة .. وناهد حاسه كل يوم بتزداد تعلقا
بي صلاح وصلاح ماشي باعد .. ونفسياتو قافله من اثر الصدمه .. وبقت ناهد جواهو شخصيه باهته جدا .. بس ناهد
ماقدرت تستحمل .. وكل يوم تحكي لنسرين الحاصل عليها.. ونسرين تضحك فيها .. وتقوليها .. قالو تاباها مملحة
تكوسلها قروض .. دي الاستعجال والانطباعات السيئة عن انسان ماعندك بيهو سابق معرفة .. عارفة ياناهد يوم
كنت راكبه مع عمر اخوي في العربية وفي واحد بتاع عربية قطع قدامنا عمر اخوي نبذو وشتمو ..بعد وصلنا البيت
اتفاجئنا انو الزول ده في بيتنا وهو اعز صاحب لابوي وليهو خمستاشر سنة برة البلد ولمن جينا لقيناهو بحكي لي
ابوي عن الولد الشتمو في الشارع لمن جبنا داخلين اتفاجا لكن ابا يكلم ابوي انو ده الولد الشتمني وطلع من ابوي
سريع وكان محرج وماكمل الزيارة من اليوم داك عمر اخوي حلف ما يشتم زول مابعرفو .. بقى اب زول في الشارع
يتشاكل معاهو يقول ليهو امشي الله يسامحك .. عشان كدا يا ناهد الزول ما يبادر بالشين لزول مابعرفه .. ناهد
قالت ليها .. يا نوسه انتي انسانه واعيه وريني اعمل شنو الزول ده بقى مسيطر على افكاري .. قالت ليها اكتبي ليهو
واحكي ليهو عن كل الجواك ووضخي ليهو انك اتغيرتي من يوم عرفتيهو ولو مارد اكتبي ليهو تاني. ومهما كانت ردة
فعلو استحملي واتعاملي بيطيبه .قالت ليها طيب انتي قاصده اراسلو في الموبايل ؟ قالت ليها لا .. اكتبي رساله في
ورقة بالقلم وسلميها ليهو .. صدقيني دي كدا فيها احترام ومعزة اكتر من رسالة الموبايل دايما في حالات زي دي
حاولي استخدمي حاجات مميزة عشان تاثر في الدواخل .. طيب اقول حاجة عشان نبقى عمليين تعالي معاي مشو
الكشك بتاع المكتبة الكان شافها فيهو اول يوم ونسريت طلبت نوع معين من الورق عليهو رسومات ورود كدا
وادتها منه وقالت ليها امشي اكتبي كل خواطرك بدون تحفظ كانك بتتكلمي مع روحك.. وطبقي الورقة ووديها ليهو
وبراك شوفي النتيجة .. طبعا طوالي مشت تنفذ الوصيه المامعروف نتيجتها حتكون شنو .من انسان نفسه قاغله
وخلاص مشى .. والمحاولة معاهو يائسة .. ولكن الاخت كانت دواخلها مشحونه بكلام عجيبوشالت القلم وكتبت
كتبت كل الجواها وتاني يوم عندها هبوط عديل من السهر والتفكير مشت لاقته وشايله الورقة قالت ليهو ياصلاح
دقيقة جاها مدت ليهو الورقة كدا بالدس قالت ليهو اقرا الرسالة دي كتبنها ليك باخر نفس في روحي شال الورقة
وختاها في جيبو وقال ليها ما يسعدني
....................................................................
باب الريح ..
5
شعر صلاح انه متلهف جدا لمعرفة مافي الورقة ..
وكان مستجلا" ليجد مكانا" خاليا" فيقرأها بهدوء ..
وفتحها مكتوب ..فيها..
المحترم العزيز صلاح ..
اكتب اليك هذه الكلمات وانا اتقطع من الندم .
اني فقدت انسان بمعني الكلمة.
فطيلة الايام الفائتة انا اعيش حالة من الاضطراب النفسي والكره الذاتي
لاني اسمعتك من الكلام السئ ما لاتستحق ومع انك اتخذت لي الاعذار وسامحتني لكني لم استطيع ان اسامح نفسي
.
لاني ظلمتك وظلمت نفسي وظلمي لنفسي ان الله هيأ لها انسان على قمة الأخلاق والأيمان . ولكن حظها السئ
جعلها تختار السوء واسلوب الكلام الجارح
لتبعده عن طريقها.
عندي كثير من التصرفات التي لاتعجبني وقد يكون ذلك خللا في التربية
فابي غير موجود وامي مشغولة بشئون النساء ومتفرغة لاخوتي الصغار فقط وهنالك اشياء اخرى لايسع لها المقام
فكنت اتمنى ان يكون رفيق حياتي واعيا" ومربيا" فيرشدني الى الطريق الصحيح ويقودني الى النور ..
وبعد ان ساقه الله لي ووضعه في طريقي فانا ابعدته واضعته بجهلي وحماقتي..
فمازلت احاول متفائلة ان يتلملم ما حطمته بيدي ..وتعود الى طيور الاماني التي افزعتها بسوء طباعي .
التوقيع :
طالبتك التي استفادت منك دروس بغير تدريس
ناهد ..
بعد ان قرأ صلاح هذه الحروف تبسم وادمعت عيناهو وقلبو رق شديد
مسح عينو كدا وعاين ليدو لمن لقى فيها اثر بلل بتاع دموع قال:
مختار الله في حكمو ..
ومزق الورقة ومشى البيت .. وبفكر في الكلام بصمت غريب
وماكلم اي زول بالخطاب ده ولاحتى صديقه العزيز فيصل ..
وبكرة ناهد كانت عيونها بتفتش ليهو في كل زاوية
وهي خايفة من انو يشوفها فهي تريد ان تراهو من غير ان يراها ..
وهو يفكر في كيفية لم الشمل ..
وشعر صلاح ان ناهد انسانة نضيفة الدواخل طيبة الروح ..وهي بالضبط كما قالو عنها متسرعة ليس الا ..
بالاختصار السحابة القاتمة عدت والذي يظهر انو صلاح كان ماخد في خاطرو من الاحراج رغم العفو والصفح
والرسالة الصادقة دي غسلت كل شي وعادت المياة الى مجاريها وانكشف الضباب بالعكس حس انو اكتشف حاجات
جميلة وهو الاعتراف بالخطأ والاعتذار وكدا يعني .. وكل واحد بقى يفتش للتاني ..طيلة اليوم ده مافي زول لم في
التاني وهو كان اكثر اصرارا" لمقابلتها ..
بكرة هو لاقى فيصل وقاليهو انا عايز ارجع لي ناهد وانا حسيت اني عايزها شديد
وماحقدر اتخلى عنها .. مختار الله في حكمو ..
قاليهو فعلا مختار الله في حكمو انت قبل يومين ماكنت قافل منها ..
قاليهو تقول شنو بس جات كدا المهم ..
اقول ليك حاجة بتصدقني والله هسي انا بريدا اكتر من الاول
هسع انا كايس ليها ما لامي فيها قاليهو في مكانهم المعتاد
مؤتمر الشمارات العالمي
وفي نفس اللحظة سبحان الله ناهد لاقت نسرين وقالت ليها انا رسلت الرسالة لفصلاح وماعارفة ردت فعلو شنو
وحقيقة متوترة ووضعي مامستقر ابدا"
ولا رد لي سلبي ولا ايجابي ..
عليك الله يانسرين دي اخر خدمة عايزاك تمشي تسلمي عليهو
وتسأليهو اي سؤال وماتجيبي ليهو سيرتي ..
قالت ليها لا.. ثم لا .. انتي مابتفهمي ..
امشي ليهو سلمي عليه عادي واسأليهو من صحته وبراك بتعرفي لو اتقبل الرسالة او ما اتقبلها ..
ايوة ماسألتك انتي كتبتي ليهو شنو في الرسالة ؟
ناهد قالت ليها والله ماعارفة ولامتذكرة منها ولاكلمة ..
قالت ليها اهو دي الرسالة الصادقة وصدقيني حتجيب نتيجة مذهلة ..
قالت ليها كويس انا ماشة ليهو . انا خلاص التوتر اهلكني عايزة ابقى على بر يا ابيض يا اسود .. ههههه غايتو !!
اتلاقو في نص المسافة هي جاية عليهو وهو جاي عليها .
قال ليها انا كايس ليك .. قالت ليهو انا برضو جاياك ..
المهم قعدو كدا واتكلمو كتير وصلاح اكتشف احلا وارق وأجمل انسانة
ومشى البيت فرحان فرح شديد خلاص
حتى اتحسر على الايام العداها بعيد من ناهد .. وهسي مامصدق روحو
لاقدر اتغدى ولا اتعشى مبسوط بسط غريب ..
لكن وين.. باب الريح جاي ..
وتاتي الرياح بما لاتشهي السفن
..................................................................................
باب الريح .. 6..
ستمرت لقاءات طيبة بين صلاح وناهد لتمكن العلاقة وزيادة التعارف..
يوم من ذات الايام جات سارة الشفاتية .
عاينت ليهم قاعدين مع بعض بضحكوا .
وكل واحد ينظر للتاني بنظرة اعجاب ومحبة عميقة ..
اتبسمت وجات ماشة عليهم .
وقالت ليهم ( هاك الحبكان ده.. ماقلتو نوبة .. !!.. زمان ياننو ماقلتي ماعايزة اشوفو..
ضحكوا الاتنين.. وناهد قالت ليها والله انا ماعارفة اشكرك كيف . انتي ماعارفة انا بعدك تعبت كيف عشان ارجع لي
.. قالت ليهم الله يديم السعادة فتكم بي عافية ..
وكما يظهر المشاعر عندهم اتطورت شديد وبقت في مراحل الرحمة والموده والخوف المتبادل والاشفاق والاتنين
شعرو ان الحب تمكن منهم تاني مابقدرو يبعدو عن بعض
اها في يوم من الايام والايام كانت ايام الامتحانات اواخر ايام لي صلاح في الجامعة
وناهد منتقلة لتانية .. صلاح قال ليها .في حاحات نحن عايزين نتكلم فيها وما تطرقنا ليها .. انتي كل مرة تزوغي من
سؤالي وانا بزوغ من سؤالك .. وهسي بقينا امام الام الواقع
احكي لي بالتفاصيل عن اسرتك عن ابوك عن امك عن طبيعة الحياة في بيتكم
قالت ليهو : طيب يا سيدي .ناس اهل ابوي .محافظين نوعا ما ..
لكن اهل الوالدة متحررين شديد ..
وحياتهم كلها هيصة وغنا وحفلات والبنات بتونسوا مع الاولاد قدام اهاليهم والحكاية جايطة والمسالة دي بقت
ماثرة على بيتنا . يعني عادي بجو اولاد عمة امتي
واصحاب اخوانها بشربو الشيشة مع ماما في البيت وبساهروا معانا لغاية الساعة 2 صباحا . وبتصلو على ابوي
وابوي عارفهم قاعدين في بيتنا والموضوع طبيعي شديد ..
بس طبعا بعض الاسر مابتتقبل القصة دي فانا لغاية الان ماعارفة طبيعة اهلك انت شنو .
صلاح قال ليها واهل ابوك كيف باقبلو مو ولدهم اللهو ابوك التصرفات الزي دي في بيته
قالت ليهو اهل ابوي من يوم اتزوج امي مقاطعنن لانهم قالو دي اسرة متحلله ومنحله مابتنفع معانا ..
بس ابوي كان بحب ماما شديد فخالف اهله واتزوجها غصبا عتهم ..
هسي كلهم مقاطعننا انا مشيت العيد الفات لاهل ابوي في الحلة ندمت علي مشيتي الناس كلهم هناك يعاينو لي
من فوق لتحت .
حتى حبوبه الكنت مشتاقة ليها هي القالت لي يابتي لمي هدومك وسافري على اهلك هنا ماعندك مكان بيناتنا.
وحتي لمن ابوي يكون موجود معانا في البيت .. قرايب ماما بجونا ويساهرو معانا وماما بتكون حايمة في البيت
بملابسها العادية وطبعا كله بحسن نيه وثقة متبادله هي بتشوفهم زي اخوانها ..
يعني ماحصل ابوي شك في امي نهائي ولافي قرايبها .
عايشين بكامل الحريه الشخصية ..
وبابا مدينا صراحنا وحريتنا على الاخر .. هسي انت من اول يوم اتكلمت معاي انا حكيت لماما وماما اخدت
الموضوع بكل بساطة وقالت لي دي حياتك وانت مخيرة في اختياراتك نحن نحترم رغباتك وبس ..
بس صراحة اهل ابوي عكس الحاجات دي تماما ..
صلاح قال لناهد.. طيب هسي انتي شخصيا فهمك وافكارك شنو تجاه الشي الحكيتيهو لي ده ؟؟
قالت ليهو صراحة انا مايله على ناس جدو .. حتي كتير بتكلم مع ماما وخالاتي في الحرية الزايدة ..وبقولو لي انتي
معقدة المفروض تتنقبي وتت مي في غرفه براك
وانا الكلام الزي ده باثر في نفسياتي شديد في النهاية بتماشى معاهم وانا بكون من جواي رافضة لكن مابيدي حيله .
.. بس الجو العام المسيطر على اسرتي اهو ده الحكيتو ليك
حتي بنات خالاتي واولاد خالتي وقرايبنا كلهم نفس الاسلوب في الحياة وبيوت قرايبنا بنفس الاستايل بتاع بيتنا .
وطبعا" انا ايامي الاولى في حياتي عديتها في السعودية لمن كنت مع بابا
ومرات بمشي لي صاحباتي سعوديات.
بلقى اسلوب الحياة عندهم جميل وفيهو محافظة والتزام بس طبعا في حاجات عندهم عكس واثرت في نفسياتي
شديد .دايما لمن نحن كنا طلبة في المدارس السعودية بنحس بمعاملة الدونية . يعني السعودين بحسسونا انو نحن
اغراب ومتطفلين
وبحسسونا انهم اعز مننا وهم اهل البلد ونحن كاننا لاجئين
حتي مرة في طالبة سعودية اتشاكلت مع زميلتها والاتنين سعوديات واحدة قالت للتانية امشي ياسودانية !! ديك
زعلت ومشت اشتكتها وعاقبوها والكلام ده اثر علي نفسياتنا كلنا الفي المدرسة .
فانا من اليوم داك بقيت عندي عقدة من نفسي ونطرتي اتغيرت لي بابا .
خصوصا لمن احس تحكم الكفيل فيهو مايقدر يتحرك اي حركة الا تحت رحمة الكفيل وفاقد الحرية تماما .. ولمن
اتكلم مع بابا بقول لي .. ديل فرحانين ساي والله نحن اعز منهم والبلد دي حقتنا قبليهم . لكن يابتي المعايش جبارة
..
غايتو كلامه بطمني شوية . وببرد علي المهم الحاجات دي كلها مع بعض سجلت جواي تناقضات غريبة ونظرة للحياة
بمنظار الظالم والمظلوم .
عدم رضا بوضعنا في السعودية وعدم رضا باسلوب الحياة في بيتنا .
وكلو معتبرة نفسي مجبورة على الحاصل ..
ياخي انت بي حالتك واسلوبك الشايفاهو انا ده لو جيت بيتنا بتخت يديك في راسك من الحاصل
صلاح سكت مساااااااافه وقال ليها .. مختار الله في حمكمو
....................................................................
باب الريح 7
طبعا زي ماهو واضح من الردود صلاح الحبيب..
وقع عليهو كلام ناهد زي الصاقعة وجواهو عصفت رياح التردد والاستياء..
وقال لناهد : والله ياناهد صراحة كلامك ده ساطني سواطة غريبة خلاص ..
أول حاجة انا اسرة زي اسرتك دي لو سمعت بيها سمع .
بطني بتطم ونفسياتي بتقفل .. وطبعا"
انا بعرف اسر زي دي قبل كدا كان عندي زميل مشيت معاهو البيت .
لقيت بيتهم بالمستوى ده ..
من اليوم داك سلام الله مابيناتنا .
هسي انتي قلتي لي .اهل ابوك محافظين نوعا ما ..
اول حاجة ديل ما اسمهم محافظين ديل اسمهم ملتزمين بالحق والشرع الرباني ..
وديل لمن ابوك فارقهم بي سبب حبو لامك ..
دي اول كبوة وكارثة في حياته ..
لانه الانسان ماممكن يفقد امه وابوه واهله الربوهو عشان حب امراة ..
احسن يعاني طول عمره ويلات الشوق والغرام ويموت .
بس ما يهد علاقة مقدسة عليا ..
عشان يبني مكانها علاقة اقل منها ..
لانو علاقة الوالدين امتن واوثق من العلاقة الزوجيه صح؟
بس طبعا" للان الفرصه قدام ابوك مازالت متاحة ..
ممكن يرجع لاهله ويمد يد الندامة ويجمع الشمل ..
ده اذا قدر غير واقع بيتو للاحسن عشان ناس جدك يتقبلوكم ..
وانا يتخيل لي المسألة محتاجة لشجاعة واصرار ..
ثم ثانيا اهل امك ديل مش متحررين ما بنسميهم متحررين بالعكس ديل مستعبدين للشيطان . يعني الانسان لمن
يبعد من عبودية الله بستعبدو الشيطان وتستعبدو نفسو وملذاته المحرمة ويحس بالضيق والاستياء زي الفي
السجن وتلقيهو دايما" زهجان ومقلق ومستاء ..
قالت ليهو صح والله هسي ماما كدا دايما زهجانة ومتضايقه وتهيج في اقل سبب وماحاسه بسعادة اصلا"
قال ليها شفتي؟ وبعدين ياناهد ..بعض الناس عندهم مفهوم غريب ..
يعني بقولو مثلا" النسوان والرجال يختلطوا مع بعض عادي ويسلموا علي بعض بالاحضان والبنات يلبسن زي
ماعايزات مادام النية سليمة .. النية بتاعة شنو؟ اذا كان الافعال دي في حد ذاتها محرمة .. سوى ان كان ادت
للفاحشة الكبيرة ام لم تؤدي .. يعني مثلا اذا زول مابشرب خمرة وعمره ماسكر . لكن شال خمرة من زول وداها
لزول تاني بكون عمل حرام وللا لا؟؟
قالت ليهو بالتأكيد .. قال ليها بس المحرم السكر وهو ماسكر ولاشرب؟
قالت ليهو طيب اها ..
قال ليها لانو حمل الخمرة محرم بطريقتو ...
وشرابها محرم بطريقتو فهمتي الموضوع؟
يعني كونو امك تلبس اللبس المتكشف قدام رجال اجانب حتى لو كانو اولاد عمتها
حتى لو كانوا صحابية وهي صحابيه .. حتى لو ضامنين انو ماممكن تشوب نفوسهم شائبة .. برضو مجرد الفعل ده
حرام وعليه ذنوب .. يعني الفاحشة محرمة بطريقتها والتكشف محرم بطريقته .. فماتقولي لي بتشوفهم زي اخوانا ..
حتى لو بتشوفهم زي اخوانها الفعل محرم وعليه سيئات ..
بعدين كونوا ابوك يكون عارف الحرام بحصل في بيته وغضب رب العالمين ورضيان ..
الحكاية دي مسيئة شديد ..
للاسف ياناهد انتي انسانه كويسة وطيبة وانا بحبك شديد بس بصراحة مابقدر اتعايش مع اسرة زي دي ولايمكن
اناسبهم انتي صح ماعندك ذنب لانك رافضة الموضوع .. بس انا حأتزوج من أجل اكون علاقة اسرية .. الزواج ده
ماهو حكاية راجل ومرة واتلاقو مع بعض وجابو اولاد وخلاص .. الزواج هو رباط بين الاسر ..
وانصهار وتعارف وكسب قرابات وعلاقات جديدة تكون سند للانسان في حياته وفخر لابناءه ..
قالت ليهو حرام عليك ياصلاح انا ذنبي شنو .؟
انا ماعايزاهم انا عايزاك انت ..
قال ليها دي اول مرحلة من مراحل عقاب الله لابوك ..عارفة ..؟
زي ماهو قال لابوهو وامو .. انا ماعايزكم انا عايز حبيبتي اللهي امك ..
هسي الموضوع اتكرر وانتي مستعدة تخسري ابوك عشان حبيبك ..
مختار الله في حكمو ..
انا مستحيل اكون سبب لقطع علاقة الابوة والامومة .. واعزلك منهم بسبب معاصيهم .. كدا بكون انا وهم في
المعصية سواء ..
فهم الشي البعملو فيهو حرام وانتي العايزة تعمليهو حرام تتزوجي زول عشان تفارقي امك وابوك .. حتى لو كانوا
على معصية فعقوقهم محرم يا حبيبتي..
قالت ليهو طيب انت خليك ونحاول نصلحهم ..
قال ليها بس انا لاداعيه ولاعالم .. ومن وين اضمن انهم حيستجيبو ..
قالت ليهو انا وانت نعمل المستحيل عشان بيتنا يتغير للاحسن
علييييييييك الله ياصلاح .. حرام عليك انا كدا بموت والله ..
عليك الله ماتقول انك حتتخلى عني عشانهم والله انا اساسا" متضايقة من ناس بيتنا وكدا والله بتخليني اكرهم لانهم
بقو سبب ..
وحرموني من حب حياتي الوحيد..
وربربرب الدموع دي رقدت هبطرش .
قال ليها خلاص ماتبكي انا عايز اقول ليك حاجة احتمال بكاك ده يروح شمار في مرقة
................................
باب الريح
8
سكتت شويه وقالت ليهو ارح فرحني ياصلاح الله يفرحك ..
قال القصة ماقصة فرحة والله القصة بتتعلق بي اسرتي انا..
وانا اترددت اقولا ليك .عشان ما افقدك ..
لكن طبعا" لازم اقولا ليك عشان تخفف عليك الحاسه بيهو ده .
طبعا اناياهد انا واحد وسط تلاتة بنات وابوي اتوفي قبل 5 سنوات
بي سبب علة وراثيه ..
نحن عندنا علة وراثية في الاسرة عبارة عن مرض عصبي في اسرة ناس ابوي..
و ابوي كان بستعمل المهدات الطبية والعلاجات لغاية ما اتوفى..
يوم وفاة ابوي كان يوم حزن لاأنساهو طول حياتي ..
ابوي نام بالليل طبيعي وبتونس معانا ..
ونضحك لغاية مانمنا صحينا الصبح لقيتو مافي في سريره ..
قلت يمكن مشى المسجد صليت وجيت برضو ابوي مافي ..
لغاية الواطا وضحت ماجا قمنا نفتش في فيهو وضربنا ليهو تلفون تلفونو رن تحت المخدة ..
مشنا علي غرفته لقيناها مقفولة اكتشفنا انها مقفولة من جوة ..
كسرت الباب برجلي لقيت ابوي معلق نفسه بي عمة وميت مشنوق ..
الحمد لله علة مراد الله .. مختار الله في حكمو
والان عندي اختين عيانات سلمى الكبيرة وحالتها مستعصية جدا حتى العلاجات ماجايبة معاها فايدة..
وسكينة ااصغر حالتها مستقرة نوعا ما بس بتجيها نوبات عصبية صعبة جدا . وسامية الاصغر وهي صحة جيدة
الحمد لله ..
ابوي الله يرحمة ترك لينا عقار في السوق.. مؤجر مسكن ودكان..
واهو عايشين منو مستورين وانا مجبور اكون ساكن في بيتنا مع امي وبناتها..
لانه مافي راجل غيري اعمامي شغالين في السوق ..
وطبعا على حسب وصية الاطباء مانعين اولادهم ..
يتزوجوا من اخواتي ..
والمعلومات الطبية بتقول انو المرض بنتقل مع جينات الذكور ..
يعني اولادي انا بكونوا مصابين لازم لو ما كلهم جزء كبير منهم ..
وعشان اقلل عدد الاصابات لازم اتزوج من خارج الاسرة ..
قالت ليهو طيب لو اخواتك اتزوجوا من خارج الاسرة ؟؟
قال ليها ابدا مابيحصل ليهم شي ..
بس مين البتزوجهم وهم في الحالة دي .؟
اتنين عيانين والتالته صغيرة ويومها كله خايفة من اخواتها يتضربوها ع او ياذوها .. امي الحاجة نفيسة بت المالح
امراة طيبة ومسالمة .
وعايشة في حزن طول حياتها بي سبب الحاصل ده والحمد لله ..
انا ياناهد فعلا اعجبت بيك وحبيتك من اعماقي .
لكن بعد معرفتي بيك صعب تقدري تتعايشي في جو زي جو بيتنا .
وخصوصا انو عمرك ما حيكون عندك بيت خاص زي باقي الحريم .
لاني انا مابقدر اعيش بعيد من امي واخواتي ولا لحظات..
انا بخلص من الجامعة وبجري سريع على البيت عشان اراعي اخواتي مع الوالدة ..اصحابي مشتاقين للونسة معاي
مالاقين الا اللحظات البلقاها في الجامعة ..
لاكورة ولانادي ولاونسات بس يادوبك امشي اصلي المسجد واجي جاري على البيت ..
اسرة ناس ابوي على اسرة الوالدة ناس ملتزمين لدرجة كبيرة ومتمسكين بالعادات.
يعني لو عرفو اي جزء من الحكايات الحكيتيها لي عن اسرتك دي ولابتفاوضوا في الموضوع..
يعني انا هسي كنت منتظر فرصة احكي ليك واشوفك لو بتقدري.. تضحي وتعيشي معاي في بيتنا .. وكل مرة بقول
ناهد مابتستاهل .. تعيش في جو زي ده .. ناهد مابتقدر .. ولمن اشوف طيبتك وحنيتك .. اقول دي الانسانة
الوحيدة الممكن تساعدني وتقفيف معاي.. ارجع واقول ذنبها شنو .. تجيب اولاد عيانين. و اقولك حاجة ؟.؟.. انا
كنت جادي اني ما اتزوج في حياتي ابدا".
بس لمن لقيتك ووقعت في حبك وبقيت ماقادر استغنى عنك ..
.نسيت الواقع المرير العايشة فيهو اسرتي.. وتوهت معاك في الغرام واخدت في رفقتك شهرين من اسعد ايام حياتي
.فبصراحة انا مابقدر اتعايش مع اسرتك وانتي مابتقدري تتعايشى مع اسرتي..
فعلا نحن حبينا بعض بس الحب عمرو ما ممكن يتحدى الواقع للناس العاقلة البتفكر في الامور بمنطق العقل..
هسي انتي عرفتي وانا حكيت ليك .. رايك شنو؟
هل كنتي بتقبلي حياة زي دي.؟
وطبعا ناهد مبهوته زي الوقعت فوقا صاقعة ..
ومطيرة عيونا من هسي اظنها جاتها خوفة .. والدموع الهبطرش القبيل راحت شمار في مرقة زي ماقال لها صلاح..
وعلى وجهها علامات الدهشة والاحزان والخوف والياس حاجات كدا مع بعض مامفهومة ماقادرة تركز كلو كلو ..
يعني تجيها من وين ولامن وين لازم تراعي مرتين عيانات عيا عصبي عنيف.. ومايكون عندها بيت خاص طول
حياتها .. واولادها يطلعوا عيانين فعلا دي ماساة مابعدها ماساة
.................................................
باب الريح
9
ناهد في بهتتها وخلعتها ديك .. صلاح قال ليها ..
ناهد انتي كويسه؟؟ مالك ؟؟..
قالت ليهو انا اول حاجة مستغربه فيك انت ..
رغم الحاصل ده .وانت عادي وبتتونس وتضحك . سبحان الله ..
قال ليها كدي خليني من الكلام ده انتي كنتي حتقبلي بالوضع ده ..؟؟
قالت ليهو .. انت بتتكلم كيف ياصلاح ..؟؟
انا هسي اكتر اصرارا" عليك وماح اتخلى عنك الا انت تسيبني ..
انا نفسي اشوف امك وافوز بحبها وحنانها واتعرف باخواتك واكون ليهم اخت رابعة وارعاهم واساعدهم واقيف مع
سامية الصغيرة واطمنها واحميها ... انا حبيتك ياصلاح انت فاهم معنى حبيتك دي .. مستحيل اتخلى عنك بسبب
قدر وقسمة الهيه انت ماعندك فيها يد ..
بالعكس انا بتمسك بيك اكتر لاني حسيت انو حبيبي في حوجة الى .
انا لو اتخليت عنك .. منين هي الاحق مني عشان تساعدك وتقيف معاك..
انا حسيت انو همك همي .. (والله ناهد ختتها ليك في حنانك يا ابو الصلح)..
قال ليها انتي شكلك لسه ماقادرة تتصوري المشهد انا لازم اخدك زيارة لبيتنا ..
قالت ليهو .. صلاح ؟؟.. بس انت قول موافق ..
انا ما تسالني وحيات ربنا لو دخلت النار انا معاك ..
قال ليها ..والله ماقصرتي وربنا يبارك فيك ..بس هل بتعتقدي انو اهلك بوافقو علي الوافقتي عليهو ..؟؟
قالت ليهو اتا بقنعهم .
انت مالك شغل بالموضوع ده بس انت قول ما حتتخلى عني ..
عشان خاطري خليني اقدم حاجة في حياتي اكون رضيانه منها .. خليني احس باني انسانه ذات فايدة خليني اكون لك
يدك اليمين.. أها قلت شنو ؟؟
قال ليها بس ياناهد انا موانعي موانع شرعيه ..
لكن بالجد والله بي موقفك ده ختيتيني في حتة ضيقة ..
وماعارف اعمل شنو واقول شنو ؟ بالجد خسارة اني افقدك ..
قالت ليهو بس انت قول خير .. قال ليها مختار الله في حكمو ..بس انا الكلام ده ما ممكن اوافق عليه ..خلينا نكون
اخوان واصدقاء .. قالت ليهو صلاح .. انت عايز تقتلني والله حرام عليك حبيبي ..
قال ليها كدي قومي امشي على البيت الوقت اتاخر والشله منتظراك..
بكرة يحلها ربها
اها كل واحد مشى اهلو واي زول راسه ملان حيرة من واقع التاني ..
صلاح مشى البيت لقى امه منتظراهو .. قعد معاها اتونس معاها وهي بدت ليهو الكلام قالت ليهو خلاص بعد
انتهيت من الدراسة نقوم نشوف لك عروس
بدأ يحكي ليها عن ناهد وعن طيبتها وعن جمالها واصالتها قال ليها بس فيها عيب واحد .. قالت ليهو شنو؟
قال ليها بيتهم حاصل حاصل حاصل فيهو .. قالت وهي؟؟..
قاليها هي رافضة الوضع وضده تماما ..
قالت ليهو اها وده بحميك تعرسها ؟؟ انت ظالم يا صلاح ولا شنو؟
ياولدي كل شاة معلقة من عصبتها . بعدين المرة لمن تكون في بيت راجلها.
راجلها هو البتحكم في حياتو وحياة زوجته ..
وشن قدرهم يدخلو في حياتك وحياة مرتك ..
ومناسبتك انت البتسويها والحاجات البتتفقو عليها انت ومرتك هي البتمشي انت وعروسك لو كنتو متفقين النسيبة
بتقعد تتفرج ساي ..
بس علا كان في سببا" اخر حاميك تعرسها ..
قال ليها لكن يا امي انا ناس زي ديل حياتهم مابتوافقني قالت ليهو انت داير تسكن معاهم في بيتهم ..؟؟ مالك
ومالهم ؟
البت هي البتشبهنا وهي الديراك اتوكل على الله ووافق..
والفيها خير ربنا يسويها..
بس انت لازم تحكي ليها بظروف اخواتك ..
قال ليها حكيت ليها .. وهي عارفة .. قالت ليهو غايتو دي بت حلال ..
هسع منو في البنوت البتقبل بي كدي ..
ربنا يحميكم ويوفقكم ياولدي ..
قال ليها انا مامطمئن للموضوع دي يا امي وخايف من اصطدم مع الناس ديل ..
بعدين هي لاهسي ماحكت لامها.. ولا لي ابوها بظروف بيتنا..
احتمال يرفضو صاح؟؟
امو قالت ليهو : كان رفضو اليرفضو الحكاية كلها قسم بس ان وافقو ما تخليها ..
زي ما انت محتاج ليها هي كمان محتاجة ليك . ده راي تاني انت مخير عاد ..
* طبعا هناك مشت ناهد برضو تحكي لامها ..
لكن الحاصل بيغادي موضوع ما بسر ولابرضى
...............................................................
باب الريح
10
الحصل انو ناهد مشت لامها ..واليوم ده لقت امها مزاجها رايق ..وقعدت تهظر معاها.. قالت ليها .يا امي انا عايزة
اسيب الجامعة واعرس واقعد في بيتي . امها قالت ليها .. ده كلام طاعم .. وانا موافقاك انا من زمان قلت ليك اي
حاجة راغبه فيها تعمليها دي حريتك الشخصية ..
مافي زول بعترض عليك الا نشوفك ..
بتضري نفسك ..لكن هسي الجامعة زاتها بقت ماعندها طعم ..
الناس تتخرج بالكميات ومافي شغل الا بالواسطة الجامعة..
بقت بس الزول يتعلم لكن ما يامل كتير ..
لانو الوظايف بقت من نصيب فئة معينة من الناس ..
اها لقيتي ليك عريس ولا اشوف ليك مصعب ود خالدة اختي.
قالت ليها عليك الله يا ماما بلا مصعب بلا غم ..
انا عندي علاقة مع واحد ومتفقين على اي حاجة..
وهو انسان ممتاز بمعنى الكلمة ..
بس ياخسارة ياخسارة ..
بي سببكم قال ماعايزني وانا هسي حياة الدنيا مسخانة علي..
امها قالت ليها بي سببنا نحن؟
نحن مالنا عملنا ليهو شنو؟؟
قالت ليها طبعا" هو زول ملتزم ومحافظ على دينو واسرته اسرة متمسكة .
وانا لمن حكيت ليهو بي بيتنا قال لي انا ماعايزك ولايمكن اناسب اسرة زي دي
وانا ياماما واحد في اتنين يا اما اعرس واحد صعلوق وبتاع هوى ..
عشان يتعايش معانا .. او اقعد بدون عرس ..
لانو رغبتي في انسان متعلم وملتزم وبخاف ربنا ..عشان يحفظني من الدنيا دي ..
قالت ليها والدخل ده في ده شنو ؟
يعرسك ويسوقك على يتو ومالو ومال بيتنا ؟
قالت ليها هو قال النسابة اهم حاجة ..
قالت ليها انتي خليهو يجينا وانا بقنعه ليك ..
بعدين المشكلة شنو بالضبط يا ناهد ..
الناس البجونا يلعبو الكشتينة ويشربوا الشيشة وللاحاجة تانية ..
انا بكلمهم زول يجينا تاني مافي .
لانه نسيبنا الجديد حبيب بتي قال الجو ده مابنفع معاي ..
اها تاني في مشكلة .؟
انتي اهم منهم يا حبيبتي ..
ناهد قالت ليها الله يخليك لي يا ماما والله ماكنت متوقعة منك التجاوب ده ..
وناهد فرحت شديد بالايجابية بتاعة امها
يلا جا الدور تجكي ليها عن المشكلة الفي اسرة صلاح
بس فكرت طويل وعرفت انو لو قالت ليها حتسوط ليها الامور..
وهي حتسوط ليها الامور وتبدل ليها الفرحة دي كارثه ..
قالت خلاص اناح اكلمها بالموضوع ده الا يتم عرسي .
عشان تبقى امام الامر الواقع ..
وحتما" بعدين ماحتقول لي طلقيهو ..
طيب لكن في مشكلة ياناهد ؟؟ هي لازم حتلاقي صلاح ويحكي ليها ..
انا لازم افكر كويس قبل ما افشل ..
انا عايزة صلاح باي تمن ..
فجأة كدا ناهد قالت لامها :
بس يا امي في مشكلة قالت ليها المشكلةة شنو تاني ؟
قالت ليها عندو تلاتة اخوات مامتزوجات .. وفيهم واحدة عيانة ..
قالت ليها طيب المشكلة شنو ؟
ناهد قالت ليها انا خايفة يقول لي اسكني معاهم في البيت ..
قالت ليها لو هو واحد عند امه لازم تسكني في بيت نسابتك
او سيبيهو ؟ وللا شنو؟ اذا مابتقدري تتعايشي في وضع ماتجازفي انا ما فاضية لمشاكل.
..(عان عان ام ناهد والله فاجأتني الشياشيه طبعا" ^_^) ..
طلعت متفاهمة شديد ..
بس المشكلة المابترضي صراحة .. لو انتو ملاحظ عزيزي القاري
انو ناهد دست علي امها قصة المرض الوراثي
وانتحار الوالد والحكايات دي ..
وحكت حالة طبيعية مافيها اشكال والحكاية حتسبب مشكلة متأزمة في المستقبل القريب ..
طبعا ناهد بكرة طوالي مشت اتلاقت مع صلاح وبشرته وقالت ليهو انا فرحانة ياصلاح
انا ماقادرة اصدق روحي ..
عارف ماما مستعده تغير وضع بيتنا وتمنع اي رجل اجنبي يخش بيتنا ..
عشان سعادتي ومصلحتي ..
قال ليها والغريبة انا برضو حكيت لامي وامي موافقة عليك ومصرة وشايفة وضع بيتكم مافيهو اي مشكلة ..
قالت ليهو طبعا ياصلام ماما قالت عايزة تشوفك ..
بعدين اخر اليوم لازم تمشي معاي البيت .. وهي خايفة انو المستور يتكشف ..وفعلا ناهد غلطت غلطة كبيرة كونها
تخبي على امها الواقع المأساوي لهذه الاسرة .. ويلا على بيت ناس عواطف ام ناهد
...................................................