ضياع الدر ..
الحلقة 17
بقلم طارق اللبيب..
طبعا" زي ما كلنا ماعارفين .. البدور كانت حالفه ومتجزمة .. مافي زول بمسك يدها غير الجيلي ..لامعتصم ولاغيرو .. اها لمن خالها حكا ليها الحصل .. قالت ليهو اسمعني .. انا اقسم بجلال الله .. وبحلف بالغيب تراني ماني حاضرة .. الا الكلام ده موصح .. اصلو الجيلي ماممكن يتاجر في الحرام .. وانا والله مابقبل بالزواج ده .. مالم اتأكد من الجيلي ذات نفسو .. وهو براهو يقول لي .. ااذا هو فعلا" بشتغل في الشغلة دي ولا لا..
ولو سمحت ياخالي .. نادي لي ابوي هسع .. قال ليها ابوك تاني مابتراجع .. لانو كلم الولد يجيب اهلو .. والولد سافر .. قالت ليهو بس انت ناديهو لي لو مافيها تعب ليك .. قال ليها لاتعب ولاحاجة .. هسي بمشي انا ديهو مشي .. كلمو براحة قال ليهو بدريه دايراك ..
الحاج طوالي لفح شالو ..وجا داخل على بتو .. قال ليها نعم .. في شنو؟
قالت ليهو ..يابا انا من الله خلقني .. ماعصيت ليك كلمة .. ولا كسرت ليك امر ..
ابوي الكلام القالوهو عن الجيلي ده موصاح .. انتظر لمن تسمع من الجيلي ..
قال ليها اسمع منو وين .. انا ما نعارف ليهو عنوان ولاتلفون ..
قالت ليهو طيب اصبر لمن تتم الفترة الاديتها ليهو ..
قال ليها الموضوع ده انتهى .. وانا اديت الناس كلمة .. قالت ليهو يابا انت غلطان ..
كيف تدي الناس كلمة بدون ماتاخد راي انا ..؟
قال ليها ماعندك راي عندي .. مش قلتي لامك دايرة تنتحري .. اشربي صبغة اشنقي روحك .. اقعي البحر .. الفي راسك سويهو انا مابتراجع ..
قالت ليهو يابا .. انت لو عنيد .. انا بتك .. ودمك جاري في عروقي ..
انا ماني دايراك بعدين تندم ..
قال ليها يابت انتي هبلة .. انتي لو تاني فتحتي خشمك .. بكتلك انا ما بنتظرك تكتلي روحك فاهمة؟ .. قومي شوفي اوضاعك ما الصق لك كف ..
قالت ليهو كويس يابوي .. مافي مشكلة اعمل العايزو ..وانا بعمل الفي راسي ..
بس انا بقول لك قدام امي وخالي وخالتي .. كلهم ياهوديل حاضرين انا ما بتزوج الزول ده نهائي .. ولو مات مابمسك يدي ..
الا بشرط واحد .. اسمع من الجيلي اعتراف .. انو فعلا بشتغل تجارة مخدرات..
قال ليها يابت اتلمي ولمي عليك خشمك .. وطلع طوالي ..
وبدا طوالي في التجهيزات .. و عمل بوماستك جديد للديوان .. وضرب الابواب بوهية ..
والسراير الماشادة حيلا .. كلها عمل ليها صيانة واعادة تجليد واللحافات .. واشتروا الملايات ..
المهم التجهيزات الاولية لتهيئة مكان الدعوة والعرس .. كلها قام بيها في 72 ساعة..
في الوقت ده حامد اخو الجيلي سافر الخرطوم ..
تقريبا ماشي يشوف طريقة اتصال بالجيلي .. او بي ناصر صاحب الجواب .. عشان يتأكد من الحاصل .. لانه ما مقتنع ابدا بالشي البحكو فيهوو الناس ..وطبعا السفرية لغاية الخرطوم .. بتاخد يومين باللواري .. لانو مافي زلط ولا سياحي ..
اها لمن وصل بيت العزابة .. وكلهم ماكان عندهم خبر بالحاصل في البلد ..حكا ليهم وكلهم استغربوا كيف الجواب اتسرب بالسرعة دي للبلد .. وكل زول بدأ يسال في نفسو .. واي زول شكا في التاني ..
حامد قال ليهم .. هسع ده مووكت لوم .. والفات مابجي ..والما الانجلغ مابنفعو اللمليم ..(يعني الموية لو اندفقت تاني مابتتلملم .. ) هسع نحن دايرين نمرة تلفون سريع .. نضربو للناس ديل في السعودية عشان يخبرونا الحاصل ..
الجواب مكتوب فيهو نص سطر بس .. شوفو لي نمرة للجيلي ولا الزول الشغال معاهو ..
ولا شوفو لي نمرة ناصر .. اتصرفو ..
قالو ليهو والله ياحامد نحن ماني خابرين اي نمرة .. الناس ديل مواصلتنا معاهو بالجوابات ..
والجواب بياخد ستة يوم ولا اسبوع عشان يصل ..
والرد مامعروف يجي متين ..
المهم سعو كلهم بالاسئلة والكلام والاستفسارات .. مالقو اي طريقة اتصال بالناس ديل في السعودية .. المهم في النهاية اضطرا حامد يكتب جواب تاني لي ناصر ورسلوهو ..
وزادو عليهو عدد الدمغات عشان يصل سريع ..
لكن المشكلة كانت انو الزمن انتهى والاسبوع جاء سريع ..
والناس هناك في البلد كلهم مستعدين للعرس اللهو .. حيكون حدث ما بعدو حدث ..
أهل الجيلي مقاطعين المناسبة .. وماعندهم اي وش يقابلو الناس
لا أمو ولابوهو ولا اختو صفية اللهي صديقة العروس .. من قبل 4 يوم من الزواج تاني مامشت على ناس العرس ,,
وبدرية رسلت ليها كم مرة .. قالت ليها انا محتاجة ليك تقيفي معاي .. قالت ليها انا اسفة والله مابقدر اجيكم ماعندي وش اقبابل بيهو الحريم ..
حاسة عيونهم بتتكلم معاي .. ومافاضل لي الا ادخل في ضفوري من الخجلة ..
ويوم الحنة ام بدرية قالت لي خالتها خليك قريب من بدرية دي .. ماتشرب ليها مصيبة ..
تموت .. أحرسيها بس لمن نسلمهم عروسهم .. تاني عندهم كان دايرة تموت التموت ..
وبدرية حست بانو خالتها مراقباها .. قالت ليها ياخالتي انتي حتراقبيني لمتين ..
الروح دي روحي انا .. وكت ادور امرقها مافي زول بقدر يحصلني ..
ولاهسع الفرصة معاكم .. اتلافو القصة ولمو الموضوع ده ..
..
ولافي زول استمع ليها .. وكل الناس قايلنها بتهرش فيهم .. وبتكضب عليهم ..
ماعدا امها وخالتها كانو حاسين انها ممكن تعمل حاجة ..
الحاصل ياجماعة بكرة اصبح اليوم الاخير والعقد بعد صلاة العصر .. وبدرية مشت مع خالتها وبنات عماتها لبيت من بيوت الجيران عشان يجهزوها للعرس ..
لانو لمن تجي بعدين لي (قطع الرحط)والرقيص..
لازم تكون في ابهي زي واحسن هيئة ..
والعقد باقي ليهو تلاتة ساعات بدرية قالت ليهم انا نعسانة شديد طلعو لي الحنة..
وامرقن برة خلني اخد لي نومة .. وتضحك وتتونس كانو مافي حاجة ..
بس مرقن بيجاي هي طلعت بالشباك .. ومرقت بالشوارع الميتة المافيها اي زول ..شوارع زرايب وجناين .. ولابسة الفنجة بس ..
وعلى وين ؟؟ ..على دربا" مشن بيهو بنات كتار .. وراحن تاني مارجعن..
وبقت قصصهم تحكي للناس حكايات .. بدريه ملصت سفنجتها وسلكت نفس الدرب..اللهو درب البحر ..
والبنات قاعدات في البيت قايلاتنها نايمة ..
اتونسن لن نعسن ونامن ..
...............................................................
ضياع الدر ..
الحلقة 18 ..
بقلم طارق اللبيب ..
البنات صحو من النوم .. وفتحو الغرفة ولقو بدرية مافيشة .. طبعا مرت ساعة كاملة وهن نايمات .. يلا وقعدن يتصارخن .. وكل واحدي جرت على جيهة .. وفي خمسة دقايق الحلة كلها جاطت.. والبنات يتجارن حفايات ..والبلاقوها كلها تقول( العروس مافيشة ).. العروس رايحة .. في تلاتة شباب بس جرو على البحر .. لانهم سمعوا بانها عايزة تقع البحر ..
وامها جات جارية .. وتسأل من إحسان.. احسان دي خالتها الحرسوها ليها .. احسان وينها .. انا ماقلت ليها راقبيها .. وينا المراقبة .. شوفو لي احسان دي .. وحات الليلة الا امعطها وازعطها .. وما إحسان وحدها؟؟ .. الحريم الكانن مع العروس .. كلهن لايصات ومافي زول لاقيهن .. جاريات بالشوارع زي المجانين .. ويقصو في الدروب والاتار ..
كلها دقائق وجا واحد من الشباب المشو البحر .. والخيبة والخسارة مرسومة على وجهه .. وقال ليهم .. ياجماعة خلاص .. ماتفتشوا .. بدرية غرقت .. البقاء لله وحده ..
انحن لقينا سفجتها دي فوق القيفة .. وعليها اثر الحنة .. ودربها دخلت على الموية ..
بس شوفو لينا ناس يطلعو الجثة من البحر ..
وامها قعدت تكورك كضب ..كضب .. موصح .. بدرية بتكون .. في .. في ..شوفوها في بيت ناس صفية امشو شوفوها .. الولد قال ليها ياحجة استهدي بالله واستغفري .. الموت حق ..
والزعيم جا مارق بسأل الحاصل شنو .. قالو ليهو بدرية غرقت في البحر .. دخل جوة طوالي .. ساق جماعة من الناس .. ومشو علي البحر ..
وقال لهم امشو نادو لينا فلان وفلان .. ديل غطاسين وحواتة وناس بحر ..
وكل الناس مشو على البحر .. حتى اهل العريس .. وابوهو .. مذهولين .. وماعارفين انو العروس رافضة ولدهم ..
لمن وصلو البحر .ابو العريس سأل الزعيم قال ليهو ياحاج هي بدرية تنتحر يوم زواجها ليه ؟ الموضوع ده عندو تفسير واحد ياحاج مع احترامي ليك . معناها البت دي ماشريفة .. وبتكون عاملة في روحها عملة وانت عايزين تكلفتونا بيها ..
الزعيم قال ليهو علي الطلاق لو مابقيت ضيفي .. انا كان قديت لك كرشك دي بسكيني الفر ضراعي دي .. يا راجل ياخايب ..
والكلام ده كان بينهم الاتنين .. يعني مافي زول سمعهم .. الناس كلها مشغولين بفتشو للجثة ..
على طول الراجل الخايب مشى لجماعتو.. وقال لي معتصم.. اها ياولدي رايك شنو؟ نقعد نكمل الفتاشة معاهم ؟ معتصم قال ليهو .. ابدا" يا بوي نحن ورانا مشاغل . .. والجنازة احتمال تلاتة يوم ماتتلقي .. نحن نسـاذن منهم ونمشي طوالي ..
الراجل الخايب قال لي الجماعة يلا ياجماعة ربنا يجمع .. والبركة فيكم نحن ماشين .. في واحد من ناس الحلة .. من الناس المنغوليين البتكلمو بي براءة ديك .. قال ليهو ياحاج انت ابو العريس ..وداير تمشي قبل العروس تتلقي ؟ انا لو بقيت بدرية مابعرس ولدك.. بقع البحر ..
والزعيم يعاين ليهم .. وقال بصوت عالي .. الحمد لله ال بدرية وقعت البحر ومادخلت عليكم .. على الحرام .. انتو ماكن رجال نسب .. وركبو عرباتهم وفاتو ..
ومازال البحث جاريا" .. من الساعة 2 ضهرا" لعاية المغرب.. قبل المغرب بشوية .. الجماعة طلعوا قطعة قماش والناس قالو دي طرحتها الكانت لابساها .. ودو القطعة لامها وقالت فعلا دي طرحة بدرية ..
وكدا اي امل عند امها انو بتها ماغرقت اتلاشى .. واتأكدت من وفاة بتها .. وبكت تبكي بمرارة ..وتقول الله ينتقم منك يا احسان .. واحسان ماجاتها ملاقتها نهائي .. قالت امشو .. فتشو لي أحسان جيبوها لي من سابع ارض .. مشو لقو احسان متدسية تبكي وترجف في البيت الكانت فيهو العروس .. وشكلها كدا مخها مامزبوط ..لانها بتبكي وتسكت .. وتسرح .. وتاني تصرخ ..
وكان يوم من أسوء الايام المرت على القرية .. اي زول يبكي بي جيهة براهو .. ومافي زول لايم الزعيم ..
لانو شاور ناس الحلة في اي تصرف كان عايز يتصرفوا .. حتى زوجتو مالايماهو .. الناس كلهم لايمين الجيلي لانه خذلهم ..ومشى اشتغل في المخدرات على حسب الاخبار (الغير صحيحة بالطبع)..
الغريب في الامر انو الزعيم مارمى ولادمعة على بيتو كان بتعامل عادي.. مع انو الناس كلها متأثرة .. راجل قلبو قاسي ..
لمن جا المغرب والواطا ضللمت ..الزعيم قال للناس على الطلاق.. اي زول يمشي على اهلو.. وصباحات الله بيضا.. مافي زول يفتش بالليل دا . البحر كله (برد).. (البرده نوع من السمك فيها تيار كهربي عالي وهي سبب غرق كتير من السباحين المهرة) .. الزعيم قال انا ما مستعد افقد لي زول تاني ..
امرقو لابرة امشو على بيوتكم نجي الصباح .. والناس دي الليل كلو يبكو ..
وبيت الفرح اتحول لي فراش بكا.. وبكا حار كمان مو بكا هين .
خلونا نمشي من جو الاحزان ده على خبر الجواب .. الجواب وصل السعودية ..
ووصل لناصر وفتحو قراهو ولقا فيهو انو .. حامد كاتب :
وصل إلينا خطاب من طرف ناصر وفيه ان الجيلي مسجون في قضية مخدرات ..
والخبر عمل بلبلة في البلد وفضيحة كبيرة وحاج احمد فسخ خطوبة الجيلي ...
والبلد كلها بتلعن في الجيلي .. الرجاء ان توافونا بالاخبا ربالتفصيل .. طبعا الجواب اتكتب قبل خبر الوفاة .. يعني مافيهو اي خبر عن وفاة بدرية ..
اها ناصر لمن قرا جواب حامد .. خاف جدا" من انو الجيلي يعرف انو جواب ناصر كان السبب .. وارتبك ارتباك شديد .. في النهاية قرر انو يحكي لحاج مهدي ..
ويكتمو الخبر على الجيلي .. ومهدي وناصر مشو لمسعد وحكو ليهو في سرية تامة ..
وقالو ليهو نحن عايزين نعالج القضية دي بدون الجيلي مايعرف ..
وماكانو عارفين انو الليلة بدريه في خبر كان ..
لو عرفو الحاصل ده كانو غيرو رايهم من الفكرة من أساسا..
المهم قعدو واتشاورو كتير جدا .. وعملو خطة محكمة ولكنها مخططة علي غير هدى لانهم ماعارفين المستجدات ..
............................................................
ضياع الدر ..
الحلقة ال19 ..
بقلم طارق اللبيب ..
طبعا" كانت الخطة العملوها الجماعة الفي السعودية، خطة غير مدروسة، لانها مبنية على معلومات ناقصة، او قول انها خطه عرحاء .لانهم. ماكانو عارقين خبر الوفاه . المهم الخطة بدت في التنفيذ الان، ونحن متابعين . مسعد اصر اصرار شديد انو حاج مهدي يسافر البلد، لانه حامد في الجواب ماحكى ليهم انو الزواج مواعيدو
جات .بس طلب منهم الاخبار بالتفصيل ، واخبرهم بفسخ الخطوبة . المهم واتفقوا على الطريقة البتم بيها تبرئة الجيلي امام اهله وناس حلته من التهمة .
وبعد مايسافر عمك مهدي بي يومين تلاتة ، مسعد هو ذات نفسه حيحكي . للجيلي الحاصل ويجهز ليهو .بعض الترتيبات والنثريات الممكن تساعدو ، لو ما وفاء بالطلبات كامله بجزء كبير منها ، بس كانو خايفين انو الجيلي مايقبل قروش من مسعد ، بغير عمل خصوصا هو قبل كدا التبرعات وكت طلوعو من السجن قبلها بالتلتة .عم مهدي اصلا هو كان مسافر لاولادو بعد شهر عشرين يوم .. قاليهم مافي مشكلة لو انا استعجل عشان الجيلي . دي اقل حاجة ممكن الواحد يعملا عشانه .استعدا للسفر وقام حاج مهدي ..بعد ما أخد الوصف كامل من الاخ ناصر صاحب الجواب ..
وطبعا" متفين على الحاجة الممكن يعملها هناك في البلد .. وأول ماوصل الخرطوم . ركب طوالي مشى لاولادو وسلم عليهو وخت عفشو وشنطو . وقال ليهم انا عندي سفرية صغيرة كدا وبجي . قال وسافر طوالى على قرية ناس الجيلي .. كان اليوم يوم خميس . سأل من بيت الزعيم حاج أحمد . ومشى لقى الناس متلمين ومفرشين في الارض وبستقبلو في العزاء والفواتح .. المهم رفع الفاتحة وقعد . ومافي زول من الناس عارفو ده منو.؟ وهو ماعرف الزعيم ده المات ليهو منو .
بعد اده الفاتحة وقعد . والديوان مليان ناس . جابو ليهو مويه شرب وختو ليهو مخدة لانو ظاهر عليهو اثار السفر والغبار . يعني من قام من السعودية وصل الحلة في اربعة ايام .. وهنا كانت الوفاة ليها اسبوع بالتمام والكمال ..
وجابو ليهو شاي شرب .. والناس القاعدين كل واحد يعاين للتاني وفي عيونهم سؤال هو: الزول الغريب ده منو؟ الزعيم ذاتو ماعرفو ..
في لحظة والناس ساكتين كلهم .. قام حاج مهدي على حيلو.. وقال لهم:
( السلام عليكم ورحمة الله .. طبعا" انا زول غريب عن البلد دي ..
وجيت ماعارف الوفاة ولغاية هسع مانعارف الميت منو؟ لكن جيت الحلة مخصوص عشان زول من اولادها ..
الحقيقة ياجماعة انا اسمي فلان الفلاني ..من المنطقة الفلانية ..متزوج وعندي خمس بنات اكبر بت فيهم عمرها 15 سنة . شغال ومقيم في السعودية في جدة .. كنت ساكن في بيت عزابة ومعاي اتنين من الشباب.. وكانو الشباب الاتنين بتاولو المخدرات .. وانا كنت مضطر اسكن معاهم رغم اني متضايق وكاره روحي ..
في يوم من ذات الايام جانا واحد يسكن معانا من الشباب الافاضل اسمو الجيلي ود فلان .. وكان انسان بمعنى الكلمة كله خير وبركة .. وكان انسان نادر الوجود في الزمن الغريب ده ..
في يوم من ذات الايام كان الجيلي نايم وانا مافي .. كبست الشرطة على البيت الى آخره .. وحكى لناس الحلة تفاصيل انو الجيلي برئ ودخل السكن فدائية عشاني وعشان ظروف بناتي .. لكن الحمد لله المحمكمة براته وطلع من السجن عزيزا مكرما محترما" ..
وانا ماعارف ارد ليهو الجميل ده كيف بس قلت اقل حاجة ممكن اعملا هي اني اجي ازور قريتو واسلم على الناس الطلع منهم الولد الملك ده ..
وبالجد ياجماعة انتو ناس تستاهلو يكون الجيلي ولدكم .. الجيلي انسان نادر الوجود ..))
بعد حاج مهدي كمل كلامو إتفاجأ انو الفراش كله ضجة بالبكا .. واي زول قبل على حيطة وقعد يجوعر ..
وعمك مهدي استغرب ماسر هذا البكاء ..
حتى الزعيم اول مرة في حياتو يبكي .والناس يشوفو دموعو .. سبحان الله الراجل القلبو قاسي ، على بتو ما بكى. يدمع من قصة براءة الجيلي ..
اها الزعيم حاج احمد قشقش دميعاتو ووقف على حيلو ..وشكر الراجل حاج مهدي ..
وقال ليهو الله يبارك في ايامك .. ويحفظ ولدنا الجيلي .. انت بالجد ازحت غم من قلوبنا لايعلم به الا الله ..
لكن للاسف اتأخرت تأخير شديد .. عارف نحن المفروض نعرف كلامك ده من قبل اسبوع على الاقل .. لانو العزاء الانت شايفو ده .. عزاء بتي الكان الجيلي حيتزوجها ، وهي غرقت في البحر ،لانها سمعت بانو الجيلي بياع مخدرات، ونحن حنزوجها لزول غيرو . عشان كدا وقعت البحر . ونحن بنمشط في الموج ليل ونهار . لغاية ما جانا جواب من منطقة في الشمالية.. انهم طلعو جثة بت من البحر . مشوهة وعليها اثر الحنة ،ودفنوها، كدا نحن وقفنا الفتاشه في البحر واستسلمنا لقدر الله ..
حاج معدي تخ طوح ولفه صينة وجا داق الواطة لامن الناس الجنبو لحقوهو مايقع يكسر راسو بي حافة الصبة ..وقعد يجوعر ويبكي زي الشافع الفطيم ..
وطوالي لبس نعلاته ومرق وقال لهم ودعتكم الله .. ياجماعة .. وقدر الناس ماحاولو يوقفوهو ماوقف. وفات ..
طبعا في الوقت ده مسعد كان حكا للجيلي قصة الجواب .. وقال ليهو حاج مهدي سافر قدامك ومشى يثبت براءتك لناس الديرة .. وانت راح تمشي وتلاقى المواضيع قدامك زينه مية في المية .. انا دقيت ليك خروج وعوده .. ومنتظرك تجيني بالبشاير .
والجيلي ارتبك وخاف جدا انو بديرية تفلت من يدو ويزوجوها لزول تاني ..
ولمن مسعد مدا ليهو قروشو .. كانت قروش ماهينه وماقدر حقو الحقيقي اكتر بكتير .. الجيلي فعلا اتردد ..مسعد قال لييهو اصلا مافي مشكلة.. بعد تتزوج تعال راجع وسددهم بالشغل ..
قال ليهو افرض حصلت لي حاجة ..يكون دين في رقبتي ؟ قال ليهو انا عافيها ليك ..
المهم الجيلي سافر في عجلة واستعجال شديد ..
..............................................................
ضياع الدر ..
الحلقة 20
بقلم طارق اللبيب ..
الجيلي غشى باب شريف في جده .. واشترى الشيلة .. وكل مايلزم تجهيزاتو ..
مع انو ماضامن البحصل هناك شنو؟ .. الزول ده زول غريب .. وفهمو شنو انا حيرني ..
المهم قام وسافر ..طول الطريق سارح في الافكار .. ويتبسم وشايف الطريق طويل .. وبفكر انو يشوف بدرية بقت كيف .. وهو كمل قريب للسنة ماشافها .. وبتخيل في بسمتها وفي عيونها واستهبالا . وضحكتها الخافتة .. وسارح مع الخيال . وماجايب خبر للناس المعاهو في السفرة .. الجيلي بريد بدرية ريدة غريبة .. ومامعروف تاثير الخبر يكون عليهو كيف ؟ ..
الجيلي وصل الخرطوم بالمساء . وقال للتاكسي يوديهو بيت العزابة .. وهناك مالقى العزابه . . لقى بلولة (الدحيش) .. سلم عليهو بشوق عجيب .. ما عارفو ده سبب المصايب والبلاوي .. قال ليهو وين الجماعة .؟
قال ليهو مشو السينما .. وقالو الليلة بايتين مع الصادق في السجانة .
قال ليهو وانت مالك مامشيت معاهم ؟.. قال ليهو انا جاي من المستشفى .. ابوي عندو حبس بول .. وقالو عندو حصوة في الحالب ..
والوضع صعب شديد .. والله يا الجيلي انا عندي عجلة جديدة بعتها للعلاج .
وبرضو ناقصة لينا قروش كتيرة .. وحق العملية لسه مادبرتو .. وماعارف اسوي شنو؟.. ابوي تعبان شديد يكورك من الالم ,,
وهسي انا ...............وسكت . قال ليهو وانت مالك كمان؟ ..
الدحيش قال ليهو وانا ظهر لي سكري .. غايتو مصايب ورا بعض ..
الجيلي قال ليهو ربنا يلطف يابلوله .. قروش العملية كمها؟ .. وراهو .. قال ليهو مافي مشكلة .. انا بدفعها ليك عشان الوالد تعبان .. متى ماانت لقيتها ممكن ترجعها في اي وقت .. ابوك زي ابوي .. وما ممكن اخليهو متالم في حالة خطرة بالطريقة دي وامشي ..
في اثناء النقاش .. الدحيش فهم انو الجيلي ماعارف انو بدرية ماتت ..
وماعرف يكلمو كيف ..
في النهاية قرر انو يسكت ومايكلمو .. قال احسن يجيهو الخبر من زول تاني .. احتمال لو عرف الخبر .. يغير رايو مايديني القروش .. هسي لانو فرحان بديني ليها.. ده الدحيش بتكلم مع روحو .. المهم الجيلي دخل استحم وطلع عد القريشات لي الدحيش اداها ليهو ..
وقال ليهو اصبر شوية .. انا امشي معاك المستشفى اشوف الوالد ..
قال ليهو لالا انت ماتمشي .. لانو البيت مامقفل كويس .. يجي حرامي يسرق حاجاتك ديل ..انت بعد اديتني القريشات .. والله تاني ماقصرت ربنا يبارك فيك ..
الجيلي بات في بيت العزابة .. والدغش قام سافر .. ولغاية الان ماعندو خبر بالحاصل في الحله ..
وصل الحله واول مانزل في بيت اهلو ..لقى وامو وابوهو .. موجودين .. ولمن شافوهو انفقعو بالبكا .. وهو مندهش من بكاهم .. لكن قال احتمال شوق ساي ..
وسلام ومرحب وحق الله بق الله .. امو قالت ليهو ربنا يعوضك ياولدي .. ويعوضها الجنة في شبابها .. قال ليها منو يايمة البعوضها الجنة في شبابها؟؟
امه سكتت ساي وعرفت انو ماعندو خبر ..
ابوهو قال ليهو .. الجيلي ياولدي انت هسي جاي من السفر .. اخد راحتك بعدين نحكي ليك ..
قال ليهو ياابوي في شنو؟؟ انا حاسي انكم داسين علي حاجة .. صفية اختي وينها ؟ هي كويسه؟؟ .. صفية جات من جوة تنفض في يدينها من الصابون .. كانت بتغسل ..
لمن الجيلي شافها اطمأن شوية ..
وسلم عليها بكل فرحة .. وقعدو التلاتة ماعارفين يحكو ليهو كيف ؟
بعد شوية جا حامد من برة .. ورفع مع الجيلي الفاتحة . قايلو عارف .. الجيلي رفع الفاتحة ومطير عينيهو .. ومافاهم اي حاجة ..
بعد سلم علي حامد بكل شوق وابتسامة . قال ليهو ياحامد اخوي .. انت رفعت معاي الفاتحة في منو؟ .. حامد قعد يعاين لابوهو وامه ..
قال ليهم يعني موعارف؟
قالو ليهو لا الجيلي كورك في حامد ( ياحاااااااااامد في شنو؟)
حامد قال ليهو : ((بدرية بت حاج احمد غرقت يا الجيلي ..))
قال ليهو غرقت كيف يعني؟؟ .. قول كلام غير ده .. انتو دايرين تسوو فيني مقلب ومتفقين عليهو وقعد يضحك وهم يعاينو ليهو..
حامد قال ليهو .. انت بعد ماسافرتا جو ناس يخطبو بدرية والزعيم قال ليهم كيت كيت نحن وبعد انت سافرتا بي فترة جانا جواب من ناصر انك كدا كدا .. قال ليهو عارف ده كلو .. قال ليهو الزعيم قال قال والجماعة جو يعرسو بدرية .. ويوم عرسها وقعت البحر .. و ما اتلقت تاني المهم .. ليهو كل تفاصيل الحصل ,,
وانو بدرية غرقت في البحر .. وفتشنا ليها ومالقيناها .. وفي النهاية قلعت في الشمالية ودفنوها هناك ..
قال ليهو اولا قصتك دي ماقادر استوعبا .. وماركبت فيراسي نهائي ..
ارح معاي على حاج احمد .. وهم في الشارع اي زول يلاقيهم .. يدور يرفع الفاتحة مع الجيلي .. الجيلي يرفض .. يقول لهم انا مابرفع فاتحة في زول ماعارفو حي ولامات .الا اتاكد انو مات فعلا".
خلاص الناس حسو انو جنا وعقلو بقى ما مظبوط ..
وصلو لي ديوان حاج احمد .. الزعيم اول حاج ماشاف الجيلي خنقتو العبرة .. ودموعو اشتتن ..
الجيلي قال ليهو .. السلام عليهم ياعمي ويازعيم البلد .. انا مابرفع الفاتحة في بدرية لاني مامتأكد انها ماتت .. لازم تقنعوني ..
حاج احمد قال ليهو ياولدي الموت حق .. اصبر والصبر جبر ..
الجيلي قال ليهو انتو لقيتو بدرية ؟ طلعتوها من البحر اتاكدتو ؟
قال ليهو ياولدي كل حاجة بتدل على الموت .. سفنجتها فوق القيف .. وطرحتها طلعناها من الموية .. واثر كرعيها دخل على البحر .. واهلك في الشمالية في المنطقة الفلانية ..(المنطقة اسمها كجي في الجزيرة مقرات منطقة في الرباطاب) .قالو طلعو جثة بت محننة ودفنوها .. ..
الجيلي قال ليهو برضو انا مامقتنع .. لمن اتاكد انو بدرية ماتت .. بجي برفع معاك الفاتحة .. واقسم بجلال الله بدرية تكون ماتت .. انا تاني في حياتي ما امسك مرة بيدي .. لامن الاقى الله ..
....................................................
ضياع الدر ..
الحلقة 21
بقلم طارق اللبيب
الجيلي في نفس اليوم طلع على السكة حديد زي الساعة 4 عصر وركب قطر بضاعة وسافر الشمالية .. وطول السفر ماضاق لقمة طعام في خشمو . وشو بقى اسود
وعيونو مغورقات وجسمو شاحب .. وخشمو ناشف .. وحالتو بقت صعبة فوق حد التصور ..لكن ظاهر عليهو الجمود والقوة .. وما انهار لغاية الان ..
وصل منطقة كجي .. (كجي) قريه على البحر . في الجزيرة مقرات .. بينها وبين ابوحمد بس البحر .. وفيها بنطون بيعدي منها لابوحمد.. ومنطقة خضراء وجميلة ..
كلها نخيل وخضرة وجمال وبها .. فيها طيبة القرية .. وجمال الجو .. وعجوة (ود لقاي) مجدعة في الشوارع.. النخل خاتي حتيت عجيب ..
ودخل المنطقة وسال من الناس الكبار وزعماء المنطقة .. عشان يوصفو ليهو البت اللقوها وشكلها شنو .. وطولها وكدا ..وصفو ليهو بيت شيخ البلد .. يعني زي عمدة المنطقة كدا .. ومشى سأله .. والشيخ نفى الكلام ده نهائي .. قال ليهو دي بلدي انا بعرفو من الشافع الصغير للراجل العجوز بيت بيت .. وكل مايحصل بادق التفاصيل انا بكون عندي منه خبر ..
المهم اكتشف انو مافي كلام زي ده .. وماطلعو اي بت .. ومافي زول رسل جواب زي ده .. ولو في زول رسل معناها عندو هدف من الكضبة دي .. او يكونو قاصدين منطقة غير البلد دي ..
وقال ليهو لو في شي زي ده .نحن كنا بنبلغ الشرطة قبل ماندفن ..
ومافي بلاغ في شرطة ابوحمد.. يعني لافي كجي.. ولا كسيكل.. ولا السنجراب.. ولا في مقل.. ولا الجريف .. يعني لغاية غرب الضيفلاب وعتمور ..مافي خبر زي ده .. (دي كلها مناطق محيطة بي كجي داخل الجزيرة مقرات .. قال ليهو مافي موضوع زي ده بتاتا.. ونحن ماسمعنا بي خبر زي ومستحيل ندفن جثة من دون يجو اهلها ..
بس الخبر ده مكذوب ...
الجيلي اتاكد من انو في لعبة في الموضوع ..
وشال خطاب مكتوب من الشرطة ..ومن شيخ البلد في (كجي) .. ومشى ..سافر رجع الحلة بي أمل ماساهل ..
في اليوم ده كانت البلد كلها مشغولة بقضية .. انو نميري نفذ الحكم على محمود محمد طه زعيم . الجمهوريين . بالاعدام .بتهمة الردة عن الدين .. الكلام ده كان في في ياناير سنة 85..
اها ياجماعة الخير .. الجيلي وصل البلد وشايل اثبات انو خبر الجثة بتاعة الشمالية مكذوب .. الجيلي سافر وجاء في تلاتة يوم بس ..
اول ماوصل لحاج احمد .. قال ليهو ياحاج احمد .. بدرية دي ماغرقت ..بدريه اما اتخطفت او شردت .. او اتقتلت عديل .. لكن موضوع الغراق ده ماصحيح .. هاك اقرا الخطابين ديل ..
ده من شرطة ابو حمد وده من شيخ البلد في كجي ..
الزعيم لمن قرا الجوابين وقف على حيلو .. وقلع عينيهو من راسو .. واتفاجاأ مفاجأة غريبة .. وقال كيف نحن فاتت علينا انو نتأكد؟من الخبر ده ؟ اي والله بس نحن ماكنا بنظن انو ممكن زول يكضب كضبة قدر دي ...
الجيلي قال لحاج احمد.. ياحاج احمد انا بوعدك لو مالقيت بدرية او عرفت عنها خبر اكيد .. مابرتاح في البلد دي تاني نهائي .. ولو بدرية فعلا ماتت انا الحريم محرمات علي لامن اموت ..
الزعيم قال ليهو وانا بقسم ليك بالله يا الجيلي بدرية تكون حية ..وتجيب لي منها خبر
مافي راجل يمسك يدها غيرك .. وليك مني وهيبة ماتحلم بيها .. لكن اتاكد انت ماشي في درب المحال ..
وفعلا الزعيم وناس المنطقة كلهم شكو بعد خبر الكذبة بتاعة جثة الشمالية ..شكو انو قصة الغراق دي تكون مدبرة وبدرية مخطوفه ..
خصوصا الايام ديك منشرة قصة الناس البشيلو الدم .. وبتاجرو بالاعضاء ..
والناس اتناقلو الخبر ..
والجيلي طول قعدتو في الحلة اي زول يلاقيهو عندو ليهو عبارة يكرر فيها لاي زول الاربعة وعشرين ساعة ..بقول (كيف تتاكدو من غراق زول مالقيتو جنازتو ؟ وماشفتوهو لمن غرق) ؟؟ وفعلا" سؤال منطقي بس الحاصل شنو؟
الحاصل شنو ؟ الناس كلها بدت تتساءل ..
والجيلي بدا من اليوم داك.. يمرق من الصباح ..وحايم الحلال حلة حلة .. ويسأل ويستفسر .. وعمل علاقات مع ناس الشرطة .. وبقو حايمين معاهو وشغالين تحقيقات غريبة .. بس كل مرة تظهر حاجة وتطلع كضب .. الزول ده في خمسة يوم
حايم ليهو 13 حلة.. لامن ناس الحلة حنو في حالو .. واصلو ماطلب مساعدة من زول
يوم جماعتو ناس القوز قالو ليهو نحن معاك ..ودايرين نفتش معاك ..
قال ليهم بدرية مسؤليتي براي وانا البلقاها .. وكل يوم يجي انصاص الليالي ..
ويجي بلاخبر ويوم واحد مافتر ولاقنع ولايئس .. لغاية ماناس الحلة حنو في حالو ..
وناس الحلة نفسهم بقو .. بين شاكين وقنعانين .. .
حاجة غريبة فعلا"..
لكن في حاجة حصلت الليلة الصباح
.........................................
ضياع الدر ..
الحلقة 22 ..
بقلم طارق اللبيب ..
في حاجة غريبة حصلت الليله الصباح ,الحصل كالاتي ..في واحد بتاع كارو ..جا وقف الصباح قبل الشمس ماتشرق .. وقف قدام بيت ناس الجيلي ..اساسا الجيلي الليل كلو مانام .. (ياربي بدرية .. دي تكون حصل ليها شنو؟ ياربي حيه وللا ميتة .. ياربي ياربي الليل كلو )..
اها الزول الجا .ده قال انا داير الجيلي .. نادوهو ليهو .. سلم عليهو والجيلي ماعرفو .. قال ليهو كيفك يا الجيلي .. انا دحين بتعرفني؟ قال ليهو والله شايفك .. لكن وين ماعارف .. قال ليهو انا عبود ود اللحمر . من الحله الفلانيه . عندنا مشوار في زول دايرك ضروري .. ومرسلني ليك تصلو هسسسع دي ..
الجيلي قال ليهو الزول منو الدايرني ؟ ووين الزول هسي ..؟ والموضوع شنو بالضبط ..قال ليهو أنا ماعارف اي حاجة . بس انت اركب معاي فوق الكارو وارح .. واكان ما ماشي وريني عشان انا مستعجل ... قال ليهو طيب طيب ..دقيقة ادرع لي جلابية وامرق معاك ..
الجيلي دخل البيت .. لبس وطلع ركب معاهو ومشو .. والجيلي مستغرب في المشوار المجهول ده ..
المهـــــم ..
فاتو الحلة الاولى والتانية ..الجيلي مازال بكررفي الاسئلة لي بتاع الكارو .. يازول نحن ماشين وين .؟ وداك يسوي ليهو اصبر .. بتعرف ماتشفق قربنا نصل . وصلو حلة كدا الجيلي بعرفها تماما" .. ونزله جم بيت .. قال ليهو دق الباب .. فتحت ليهو الباب إحسان خالة بدرية .. قالت ليهو مرحب عليكم السلام .. ادخل يا الجيلي .. ده بيتي . سلم عليها حق الله بق الله .. قال ليها كيف الحال ؟ ..ان شا الله خير ؟ لقيتي خبر؟
قالت ليهو .. ده الموضوع الناديتك ليهو ..زااااااااتو ؟ ..
قال ليها انا اتذكرت انك ساكنة في الحلة دي .. بس ماكنت بعرف بيتكم .. قالت ليهو انا ساكنة هنا معاي اخت زوجي .. ووليداتي الصغار ديل .واحد 3 سنة واحد سنة او اقل .. .. زوجي مسافر في الجنوب ضابط في الجيش .قالت ليهو .. انا سمعت امبارح بالليل انك جيت ماكنت بعرف انك جيت .. ورسلت ليك ود الاحمر .. (بتاع الكارو) .. يناديك لي .. .. ..
الحاصل يا الجيلي.. قصة بدرية . قصة اغرب من الخيال .. انت طبعا" سمعت بي قصة الناس الجو من الخرطوم ..عشان يعرسو بدرية لولدهم .. بدرية كانت بتحلف الاربعة وعشرين ساعة انها ح تنتحر ..ح تنتحر ..
وامها قالت ليها انتحري بعد العرس .. وابوها قال ليها اعملي العايزاهو ..العرس بتم فوق راسك .. وانا حرسوني ليها اتابعها ..عشان امها كانت مشغولة ..
وفعلا بدرية جربت الانتحار مرتين .. المرة الاولى .. لمن كان بحننو فيها .. الحنانة خلت جنبها كيس الصبغة .. خلت الحنانة طلعت ..وشالت الكيس سفت منو .. وانا كنت مراقباها .. جيت جارية عليها وكففتها ..وطلعت الصبغة من خشمها ..ودقيقتها بي عصبية وانفعال .. وغسلت ليها خشمها بالليمون .. ومافي زول اكتشف القصة دي .. وانا ابيت اكلم امها لانها كانت مافاضية لينا ..
المرة التانية كانت يوم العرس .. ونحن كنا طابقين ليها الحنة .. وانا فضيت نفسي نهائي ..وبقيت بس براقب فيها .. من بعيد .. بلبد في حتة ..وبكون بعاين ليها ولي تصرفاتها .. بدت تتصرف تصرفات غريبة .. ووتتكلم براها ..والحالة بتزيد عليها كل ماوقت العرس قرب ..
حتي في النهاية بقت تضحك بلاسبب .. لمن البنات لاحظن ..
قالت لي للبنات طلعن مني الحنة .. واطلعن برة خلني اخد لي نومة .. انا تعبانة شديد ..
وانا كنت قاعدة في الزقاق الغربي بسمع في الكلام كلو .. الكلام ده كان في بيت ناس نفيسة زوجة النور ..
والبنات طلعن قعدن في البرندة ..اتونسن ونامن ..وانا لابدة في الزقاق .. اول ما البنات سكتن من الونسه ..
وبدرية اتأكدت انهن نامن .. وكان في واحدات طلعن ..
بدريه فتحت الشباك براااحه ..وانا بعاين ليها ..
ومرقت بشارع جنينة صالح .. وجارية بسفنجتها وطرحتها ..وانا جارية وراها ..وصلت البحر ..
وملصت سفنجتها ..ودخلت البحر وانا بعيده منها امكن عشرين متر ..
بس الحمد لله ربك رب الخير ..لقيت ود الاحمر (بتاع الكارو ) ..بسقي في حمارو فوق البحر .. حصلها بعد دخلت الموية .. وقبضها .. وانا حصلتها في اللحظة الاخيرة ونفسي مقطوع من الجري ..
ومسكتها وهي كان بتبكي بهستريا .. قلت ليها وعدد مني يابدرية مافي زول بتزوجك غير الجيلي .. بتصدقي خالتك ؟ قالت لي ايوة بصدقها .. قلت ليها اركبي في الكارو..
وكانت الطرحة وقعت في البحر .. والفنجة خليناها في محلها ومشينا باشارع التحت ولفيناها بي شوال فاضي .. والحلة كانت فااااضية الناس كلها في العرس ..
جبتها قفلتها في البيت الجواني .. وطبلتها بالطبلة ورجعت ناس اختي ناس العرس لقيتهم طالقين البكا .. وانا ذاتي بقيت ببكي واجوعر اكتر من الناس .. وبقيت زايـغة من اختي واختي كايسه لي عشان انا الكنت حارساها .. وهي تكورك (شوفو لي احسان .. احسان وينها ؟؟ وانا سمع فيها وكل مرة ادسه في حته .. أمكن لي تالت يوم لاقيتها وبكت معاي وفي النهاية جضمت لي .. وقالت لي ده كلو منك انتي .. انتي انا ماحرستك بدريه .؟ وانا ساكتة وكاتمة السر .. وقلت اصلو مابتكلم ..
قلت الحمد لله خليهم يعرفو قدرها .. خليهم يفتكروا انها ماتت .. والله مايشوفوها تاني الا يجي الجيلي .. ويوم البكا قلت بكلم ابوها بعد يفوتو ناس الخرطوم ..وبرضو غيرتا راي .. بس المشكلة من يومها الدخلت البيت وهي ساكتة ومامركزة ماعارفة الحاصل عليها شنو احتمال تكون جاتها نفسيات .. بس انا مااشتغلت بيها كتير اصلا ماعايزاها تظهر .. والسر ده مافي زول عارفو الابخيتة حماتي وود الاحمر بتاع الكارو الجابك ده ..
وديل الاتنين معاهديني انهم مايتكلمو .. وناس الحلة من يوم بدريه الغابت هم فوق البحر يفتشو ليل ونهار .. بخيتة حماتي قالت لي انا عندي فكرة نوقفهم بيها .. وهي كانت بتقرا في ابوحمد .. كتبت جواب مرسل من منطقة في الشمالية ماعارفة اسمها شنو كدا .. انهم لقو الجثة وشنو وشنو .. المهم خلي بخيتة تجي توريك كتبت شنو .. اصلها بت مصلته .. وهي صاحبة بدرية وصاحبة اختك صفية .. وكان ماخاف الكضب صفية خابرة انو بدرية عايشة ..واحتمال تكون بخيتة الغتيتة كلمتها بس مامتأكدة حتى لو كلمتها بتكون محلفاها .. المهم ..
هسع بدريه قاعدة في الاوضة الجوانية في البيت الورا معاها بخيتة .. كل ما زول يدق الباب بوديهن بيغادي حتن اجي افتح الباب .. ((بدريه درة يا الجيلي .. والدر عمرو مابضيع .. عشان ربنا بحفظو وبسخر ليهو الناس تخاف عليهو وتراعيهو ... ))...
بس بدرية حالتها ماعاجباني .. ومتأكده انها عيانه ..نهائي لاسألت من اهلها ولا امها ولا ابوها ..ولاسالت من خبر العرس ولا سالت منك .. بس ساكته ..
ومن يوما الجات مانطقت كلمة .. الاتقول دايرة مويه ..
المهم يا الجيلي يا ابني .. في الاخير انا بي تصرفي ده رغم اني ماغلطانة ..لكن حسيت اني في مشكلة حقيقية .. وماعارفة ردة فعل اهلها حيكون شنو؟ ..وحاج احمد يسوي معاي شنو..؟ حقيقة انا خايفة شديد يا الجيلي .. بس اكتر حاجة طمنتني وفررحتني ..البارح سمعت انو حاج احمد .. وعدك لو اتلقت بدريه ..
حيزوجها ليك .. وعندو ليك وهبيه كمان.. وبقت مشكلتك تلقا بدريه كيف؟
وانا هسي حليت لك مشكلتك .. لكن انا الواقعة في مشكلة .. بتحلني كيف؟..
.............................................................
ضياع الدر ..
الحلقه 23 ..
بقلم طارق اللبيب ..
الجيلي بسمع في في احسان .. بانتباه وتركيز ومشاعر مختلطة ..استغراب.. وشفقة .. وخوف .. وفرح .. لمن اتصبب بالعرق والواطه برد طبعا نحن في شهر واحد والبرد زيفة .. بعد خلصت شال نفسو وختاهو .. وقال لها .. ربنا يجزيك خير .. يا احسان وانتي ما مشحوده .. الحال شريك الوالد.. والموضوع بتاع الزعيم واهلها ده .. موضوع بسيط .. في النهاية حيسوو ليك شنو يعني؟.. المهم انتي عملتي الصح.. ومن احياها فكانما احيا الناس جميعا"
الموضوع ده خليهو علي .. قالت ليهو خش شوف بدرية احتمال لمة تشوفك .. ترجع لطبيعتها.. قال ليها : ﻻﻻﻻ .. انا مشتاق اشوفا لمن حاس روحي دايره تمرق .. لكن ده ماوكتو .. انا داير اهلها يشوفوها بي حالتها .. عشان يعذروها ومايلوموها ولايأذوها بي اي كلام .. بعدين علاجها هين ان شاء الله انتي بس قولي يارب.. قالت ليهو .. ربنا يكملك بي عقلك يا الجيلي ..
خلاص انت حتعمل شنو ؟ قال ليها انت اصبري وبتشوفي .. هسع اديني حاجة اكلها انا الجوع هلكني هلاك .. قالت ليهو بس خمس دقايق .. هبلت الصاج .. دفقت فوقو العجين .. وقلبت ليهو قراصة بوخها يلوي .. وكبت ليهو فوقا روب مشلهب .. اكل فضلة خيركم .. لمن حس العافية دبت في جسمو ..شرب ااموية وغسل ايديهو وفركن كدا وقال اللهم اجعلها نعمة واحفظها من الزوال اها يا احسان انا ماشي ونشوف البسويها ربنا .. قالت ليهو امش لود اللحمر بتلقاهو في الشدر القدامي .. اركب معاهو يوصلك .. قال لالا .. انا بمشي كداري ساي .. عشان اقدر افرغ طاقة الفرحة دي حاسي اني داير انشق نصين ..
اول ما وصل الحلة ما مشى للديوان بتاع الزعيم .. مشى لي ام بدرية وقال ليها كيف احوالك .. انامن يوم عزيتك تاني ما اتلاقينا .. قالت ليهو سامعة بيك ياولدي ..حايم الحلال حلة حلة .. وخليتنا متشككين في موت بدرية .. بي سبب الخبر الجبتو من الرباطاب ..
قال ليها ممكن تناادي لي حاج احمد داير اتكلم معاكم شوية قبل ما أسافر .. ويكون الكلام ده برانا التلاتة بس .. قالت ليهو خوفتني يا الجيلي في شنو .. بدرية منها خبر؟
قال ليها بدرية ضيعتوها براكم تسأليني منها أنا؟ ناديهو لي ..
المهم رسلت للزعيم . وجاء متلملم وشايل عصاتو .. قال الجيلي؟ الجيلي ده الجابو جوة شنو؟ الزول ده مابدخل على الحريم الا لموضوع خطير ..
الجيلي قال ليهو اتفضل ياحاج .. البيت كان فاضي والوكت زي حداشر ضهر 12 كدا
الزعيم قعد .. قال ليهو يا حاج احمد انت .. ماحفظت لي الامانة الانا امنتك ليها ..
انا سافرت منك وانت عاهدتني اني اوفي شروطي واجيك القى امانتي موجودة عندك .. اجي القاها سبب حياتي مافي ويقولو لي غرقت .. وفي النهاية اكتشف انها ضايعة ومامعروف الحاصل ليها شنو وانتو عايشين في امور ضلمه ..
ياحاج احمد انت البت لمن قالت ليك انا ماعايزة اتزوج الزول ده ليه تجبرها ؟؟ وكمان تقول انتحري اشربي صبغة اقعي البحر .. ؟؟ وانت عارف بدرية وقوة راسها وحماقتها ..
ولا ناسي انها دي بتك وماخده طبايعك ؟ انت عارف انك انت السبب في موت بدرية لو ماتت وانت السبب في ضياعها لو ضاعت ؟
وانتي ياحجه .. ماحرام عليك تقولي ليها موتي وانتحري بعد تعرسي؟
معقول ناس عندهم درة زي بدرية يضيعوها بالطريقة دي ؟ الزعيم يسمع مدنقر .. والام تشتت في دميعاتها وساكتين بس ..
قال ليهم على كل حال حتى لو بدرية اتلقت حية هي تاني مابتكون مسؤليتكم .. وبتكون مسؤولية الزول الانقذها ..
الحمد لله انا لقيت بدرية وفي مراة صالحة انقذتها من بين الموجات ولقتها في البحر تصارع في الموت وطلعتها .. وحفظتها من الضياع ..
لكن للاسف المراة قالت تاني مابتديها زول .. وقالت ما بتخليكم تشوفوها نهائي لانكم مابتستاهلو .. تكون عندكم بت زي بدرية ..
الزعيم رفع راسو قال ليهو عليك الله يا الجيلي الكلام ده صحيح؟
عليك الله يا الجيلي ماتزرع فينا امل كاذب.. انت ماعارف الحسرة والندامة الحاسي بيها انا جواي ..
ما مشكلة يا الجيلي نحن بس نتأكد انها كويسة وسليمة ونشوفها .. ونوعدك انو ما حنسوقها من المراة اللقتها .. بس علي الاقل نشكرها على عمليتها ..
ونمشي منها امها قالت ليهو كيف يعني يا الحاج ؟ البت بتنا ؟ الجيلي قال ليها بتكم ؟ وينها؟؟ وديتوها وين؟؟ ضيعتوها ليه؟ يا حجة لو الزول عنده درة.. وجدعها في البحر.. وخلاص ضاعت منو .. وقنع منها وجاء زول فتش ليها وشالها.. واحتفظ بيها .. بصح سيدها الاول يجي يطالب بيها؟
على كل ..المهم للاسف .. انا مابقدر اقول ليكم ..لاني وعدت المراة.. الا هي توافق ..
.
ولو بتوعدوني انكم ما حتاخدوها منها .. انا بمشي استأذن منها .. تخليكم تشوفوها مرة واحدة .. وليعلمكم .. بدرية عيانة من يومها الوقعت البحر .. وعقلها مارجع ليها خالص واحتمال لو شافتكم حالتها تزداد ..
لانكم انتو الاتنين سبب في الحاصل ده كلو .. امها قالت ليهو عيانة مالها .. قاليها جاتها حالة نفسية وكضمت ما بتتكلم نهائي وسارحة بس .. الزعيم قال ليهو انت شفتها بي عينك ؟ احتمال تكون مابدريه.. الجيلي قال ليهو .. لالا ياها بدريه انا بقول كمان لكم كلام زي ده كضب .. الزعيم قال ليهو امش كلمها لينا يا الجيلي ..
.
امها قالت ليهو: (بس اوع يكون غشتك احسان الكضابة ولعبت بيك ..!!!!!! .. )
لاحول ولاقوة الا بالله .. الجيلي زنننننننننننن راسو ضرب ..
خصوصا" انو هو ماشاف بدرية .. معقول احسان كضبت علي ؟؟ انا فعلا" ماشفت بدرية .. اضمن كيف انها موجودة يالطيف يالطيف .. معناها احسان مشهورة بالمقالب ..
لكن ياربي قصدها بالمقلب ده شنو؟ وليه لو بتكضب قالت لي تعال شوفها ؟
وستين سؤال جو في راس الجيلي في لحظة واحده ..وخلاص مخو داير يطرشق ..
...................................................................