المسؤولية .
الحلقة 8 ..
بقلم طارق اللبيب ..
طبعا لمن محمد شاور كوثر .. مشاورة خبر .يعني هو اصلا مصمم يكلم البت .. بس عايز يدي كوثر خبر .. وكان من فترة بفكر في طريقة يكلم بيها البيت دي ..
كوثر قالت ليهو على كيفك يامحمد.. انا تاني مابعترضك في حاجة .. الحاجة البتشوفها صاح اعملا . وانت تتحمل مسؤليتها ..
قال ليها حاضر . ان شاء الله يا كوثر مايحصل الا الخير
المهم بعد جات نور من المدرسة .. وارتاحت شوية واتغدت ناداها .. تعالي يانور ياحبيبتي انا عايزك .. قالت ليهو حاضر يا بابا.. اجيب ليك معاي موية ؟
قال لا لا شكرا" .. سيبيها الموية .. اناعايزك في موضوع ضروري ..
جات وقفت قدامو ..وقلعت سفنجتها اللابساها.. والكرعين ديل بيوووض .. ونضيفاااات ..
وقعدت قدامو في المصلاية واتربعت .. وربعت يدينها .. وقالت ليهو .. اها يابابا.. قول .. !! .انا ح انتبه لكلامك شديد.. وبقت تغمض وتفتح في عيونها وتتبسم..
محمد قلبو وجعوا . وبلع ريقو .. وقرررب يضعف .. وكوثر قاعدة جوة في الاوضة ..متمحنة وتعاين ليهو..
محمد قوى قلبو ، واتنحنح وقال ليها .. انا عايز اسالك سؤال يانور ..
قالت ليهو اسألني يابابا.. انا بحل اي سؤال ح تشووووف.. قول بس انت ..
قاليها طيب.. من هو النبى الذي اتربى في بيت ما بيت اهلو . والناس الربوهو ماعارفين اهلو .ولاعارفين امو ولا ابوهو ..
وكانو بسموهو اللقيط؟
قالت ليهو ايوه عارفة يا بابا .. ده سيدنا موسى . لمن فرعون قال عايز يضبح الاطفال..
سيدنا موسى امو ختتو في تابوت من الخشب.. ونزلته كدا برااااحة في البحر ..
والبحر شالو ..وبقى ماشي وماشي وماشي .. (تحكي وتحرك في يدنها وتغمض في عيونها ..) وشفتا يابابا .. في بنات كانو شغالين في بيت الفرعون.. شافو الطفل ماشي في البحر .. وخاضو في الموية وطلعوهو .. تصدق يابابا فرعون كان عايز يضبح موسى اللهو الطفل ده نفسو شفتا كيف؟ .. لكن هو عشان رسول ربنا حماهو ..
حكت لينا كدا ساتاذة سامية .. وقالت زوجة فرعون قالت لفرعون خليهو لي انا اربيهو بينفعني .. عشان كدا ماكانو عارفين امه وابوه ...
قال ليها عليك نووووووووور يانور .. انتي بت شطورة ..
يلا يانور انتي زي موسى ده بالضبط .. قالت ليهو كيف يعني؟؟ !! .. انا رسولة؟
قال ليها لا .. يعني نحن لقيناك وماعارفين امك وابوك .. قعدت تضحك وقالت ليهو .. هوي يا بابا . كيف يعني ؟؟ انتو امي وابوي وماعافرين نفسكم؟
قال ليها يانور انا قاعد اكذب ؟؟ قالت ليهو لالالا .. ابوي انا مابكذب.. وبكره الكذب كمان.. عشان الكذب حرام.
قال ليها يلا يانور اسمعيني كويس .. انا وكوثر لقيناك في حتة وماعارفين امك وابوك منو؟
وكوثر دي امك الربتك لكن ماولدتك ..
قالت ليهو يعني لقيتوني في تابوت في البحر برضو ؟
قال ليها لا لا .. لقيناك في حتة بعيدة في الخرطوم مع مراة .. والمراة قالت ماعارفة امك وابوك .. ونحن شلناك وانتي كنتي صغيرة .. وربيناك ..وبقيتي بتنا ..
سكتت مسافة .. وسرحت بعيد .. وقالت ليهو طيب ليه ما سألتو من امي الولدتني؟ .. مكانها وين؟ والحصل ليها شنو .؟
احتمال كان عايزين يضبحوني وهي انقذتني .. وحتجي تاني تاخدني منكم ..لالالا يابابا ماتقول كدا انا مابمشي مع اي زول ..
انت يابابا ماعاوزني ؟ انا والله بحبك شديد وبحب ماما .. تاني ماعندي ام ...بابا ماتقول تاني كدا عليك الله يابابا .. وعيونها رقرقن .. ودموعها اشتتن زي اللؤلؤ ..
كوثر جوة اتفعت بالبكا..
وهي قامت جارية عليها وتقول .. يا ماما مالك؟؟ .. ماتبكي انا مابمشي منكم .. بابا بهظر معاي ساي .. ومسحت ليكوثر دموعها بيدها ..
قالت ليها فعلا" يانور ابوك كلامو صح .
قالت ليها حتى لو صح .. انا ماااا بمشي منكم لاي زول تاني .. بس انتي اوعديني ماتبعديني منك ياماما .. انا خايفة شديد .. ورقدت في حضن كوثر .. وكوثر دموعها بالات صدرها ..
محمد قال ليها تعالي يانور .. ومسكها حضنها على صدرو ..وقال ليها نحن مابنخلي زول يسوقك مننا .. بس دايرنك تعرفي الحكاية دي ..
بس ماتكلمي زول نهائي بالكلام ده حاضر حبيبتي ؟؟.. قالت ليهو طيب يا ابابا..
قال ليها خلاص امشي ارتاحي شوية انتي جيتي تعبانة ..
.مشت غرفتها وبقت سارحة وتتكلم براها .. انا اسمي نور محمد .
امي كوثر . وناس المدرسة عارفين كدا ؟ والاستاذة بتقول لي كدا ..
طيب كيف ابوي يقول هو ما ابوي ؟
ابوي مابكذب نهائي .. طيب كيف يعني عندي امين ؟ وعندي ابويين ؟
طيب وين ابوي التاني ؟ وين امي الولدتني .؟ تاني تهز راسها كدا ..وتقول لالالا .. مامعقول كدا ما صح .. تاني قالت لنفسها هوي يانور نومي خلاص ..ابوك وامك قالو مافي زول حيسوقك من بيتك .. ورقدت نامت .. (يحليلا) .. قمة البراءة ..
على من تقع مسؤلية هذه الفوضى التي جاطت راس نور ؟؟ على من؟؟..
وتاني بقت مابتجيب سيرة الموضوع ..وبتخاف انهم يجيبو ليها سيرة .. وبقت تعاين لي محمد كتير ..وتعاين لي امها بنظرات كدا فيها نوع من الاستغراب .. وهم ماقدرو يفهو ده شنو؟
يوم من الصباح طلعت كراساتها واي كراس فيهو اسمها .. بتكتب فيهو حاجة غريبة ..
اسمها مكتوب .. نور محمد .. بتكتب ( نور محمد و...........)..
كوثر قالت ليها ده شنو يانور .. قالت ليها ده محل سم ابوي التاني.. لاني ماعارفه اسمو عملتو نقط نقط .. لمن اعرفو بكتبو ..
قالت ليها لالا يانور .كدا ماصح. الاستاذة حتسألك .. وانتي حتطلعي السر القالو ليك ابوك.. امسحي الواو دي والنقاط ..
المهم باختصار البت عاشت افكار ومشكلة اكبر من عمرها بكتير .. حتى ماقادرة تفهم ابعاد الكلام ده يعني شنو؟
وبتتحاشا تتكلم في الموضوع ..وهي مشغولة كل الوقت وتسرح سرحات طويلة وغريبة .. ومحمد وكوثر مراقبين حالتها وقلوبهم تتقطع .. لكن في النهاية .. ربنا رسم الامور كدا ..
مرت الايام ونور في الامتحان اتدهورت .. وحتى مازعلت من نتيجتها السيئة
كانت افكارها شاردة طول الوقت .. ومرات تكون بتذاكر تسرح وتلوك قلم الراس لمن يكمل ..
والفرحة الكانت فوقها والنشاط والحيوية والضحك داك بدأ يتلاشى شيئأ فشيئا..
محمد يوم جاء من الشغل فرحان .. وقال لي كوثر.. الحمد لله ناس الشركة قبلو طلب النقلية للخرطوم .. اخيرا حنمشي نسكن في بيتنا الملك ..
نور قعدت تبكي .. قال ليها مالك يانور ؟ قالت ليهو يابابا انا ما ماشة .هناك في الخرطوم الحتة الفيها المراة الحتسوقني منكم ..
قال ليها انا قلت ليك مافي زول بسوقك مننا .. انتي ما مصدقاني ؟ قالت ليهو مصدقاك يابابا ..بس خايفة المراة تجيك وتقول ليك اديني البت الاديتك ليها زمان .. ويمكن يسرقوني بالليل وانتو تكونو نايمين ..
قال ليها ابدا" حبيبتي مافي كلام زي ده .. لو امك وابوك ظهروا حنخليهم ساكنين معانا في البيت .. حاضر حبيبتي ؟ ماتبكي انتي شطوورة ..
وبعد كم يوم تمت النقلية ..وودعو تاس الحي ..بكل مافيهم من الذكريات الطيبة ..
ورحلو الخرطوم .. ارض العجايب والمحن .. وكمابدأت المأساة من الخرطوم .. ح تتواصل المآسي في الخرطوم .. المدينة الحاضنة الخير والبلا ..
...........................................................................................................................................................................................................
المسؤولية..
الحلقة 9
بقلم طارق اللبيب..
الجماعة طبعا" سافروا الخرطوم .. واول حاجة نزلو في شقة قريبة من البيت حقهم ..على بال مايجهزوا البيت بالعفش اللازم . كلها يومين تلاتة.. زاروا فيها الاهل . والاقارب .. ونور معاهم طبعا" في اي زيارة .. وكان ظاهر عليها ظاهر عليها الخوف والفزع .
وكانوا بعض الجهلاء والجاهلات في الاسرتين ..بنظروا ليها بإشمئزاز .. وفي ناس مابسلمو عليها .. غايتو عندنا صنف كدا من البشر .. لايصدق ..
وطبعا" القصة دي نور حاسة بيها ..بس ماعارفة السبب شنو ؟
والمسألة زادت من خوفها وقلقا .. واي زول يدق الباب هي بتخش جوة تتدسا .
استمرت معاها العملية دي فترة ..وبعد داك بدت تخف حبة حبة ..
وبقت لما امها تكون ماشة اهلها.. تتحجج باي حاجة عشان ماتمشي معاها ..
لان النظرات بتاعة الناس بقت تضايقها ..
طبعا اتحولت لمدرسة قريبة من المنطقة الساكنين فيها .
والاحوال في المدرسة كانت عادية وطبيعية .. لانها المدرسة كانت بعيدة من المنطقة الساكنين فيها الاسرتين ..
وما كان في زول من المدرسة لا الاستاذات ولا الطالبات عارف عن نور او عن حياتها شي غير انو ابوها محمد وامها كوثر ..
بس نور بقى عندها احساس بعدم الانتماء لاي انسان .. فقدت الاحساس بامان الاب .. وحنان الام .. مع انو كان محمد بتعامل معاها احسن من معاملة الاب الحقيقي .. بس احساس انو ده ابوها .. راح من جواها .. طبعا" في احساس
بالاب بسيطر على الوجدان .. حتى لو كان الاب سئ ومعاملتو كعبة ..
بس بتلقى جواك ولاء وانتماء ..كدا اجباري .. بجبرك انك تقول في النهاية ده ابوي ..
وكذلك الام ..مهما كانت لاتمثل دور الام .. برضو الاحساس بانها دي امي ..نفس الشي بكون حاجة فوق الاراده والتحكم ..
بس نور مع مرور الايام ..بقت تحس بالغربة والوحشة .. ولمن امها او ابوها واحد فيهم يهيج فيها .. بتتحسس شديد وبتحزن حزن مبالغ فيهو ..وبتقول ليهم مع انكم انتو مامجبورين علي .. وانا بقيت سبب تعب ليكم ..
ولمن امها تعمل ليها الاكل بتشكرها زي شكر الزول الغريب .. بي زوق واحساس عالي .. امها مفتكرة انو ده طبعاه كدا .. لكن نور حاسة بي انو ده احسان من كوثر ما من مسؤوليتها ,,
وبقت تحس بعمق الهوة .. وبعد المسافة بينها وبينا وبين كوثر ومحمد .. كل ما هي ماشة كبيرة ..
وبقت تلاحظ نظرات الاهل الغريبة بوضوح اكتر.. يوم كان في سماية عند ناس ببقو لمحمد ..
وكانو معزومين .. مشو التلاتة .. وطبعا نور كان عليها نور وبهاء غير عادي
اها مشت قعدت مع البنات الفي عمرها .. نور كانت شايلة كيس فيهو شبس ..وهو عبارة عن (بطاطس مقليه .تباع في اكياس)..
نور دخلت يدها في الكيس ومدت لي واحدة من البنات .. البت لمن مدت يدها عشان تشيل من نور..
ام البت جات جارية من بعيد .. ونتلت يد بتها كدا . عشان ماتشيل شبس من نور ..
نور استغربت وبقت تعاين للام .. ومافهمت هي عملت كدا ليه ؟
المرة ساقت بتها وقالت ليها كلام في اضانها ومشت ..
ونور بقت تفكر.. ياربي المرة دي ليه حمت بتها تشيل مني ؟وقالت ليها شنو؟
يلا بعد شوية جابو صينية الاكل . ولما البنيات ديل قعدن فوق الاكل ..عشان ياكلو .
جات نفس المرة وهاجت.. وقالت البت دي مفروض ماتاكل مع البنات ديل ؟
تقصد نور ما تاكل مع بقية البنات ..
النسوان المعاها بقو يسكتو فيها ..ويغمزو ليها ..ونور لاحظت كل حاجة ..
قامت طوالي من الاكل ..اساسا" هي ماشالت ولا لقمة .. مشت على المغسلة
وبقت تعاين لروحها في المراية.. وتعاين ليدينها وفستانا .
احتمال لو وسخانة ولا فيها حاجة مامزبوطة ..
بس لقت نفسها هي انضف واجمل واحد في البنوت ..
استغربت ياربي ليه المرة دي قالت كدا؟
والسؤال التاني النسوان ليه ماسألوها من السبب ..
جات راجعة قعدت في الكرسي والبنات بياكلو .. بعد شويه في مرة جابت ليها اكل في صحن .. نور قالت ليها شكرا" ياخالتو ..انا ما حاسه اني جيعانة ..
كوثر جات مارة وعاينت للبنات بياكلو . ونور قاعدة بعيد في كرسي براها ..قالت ليها ليه يانور مابتاكلي ؟
قالت ليها ماجيعانة يا امي ؟
في واحدة من البنات قالت ليها .. حموها تاكل معانا..!!
قالت منو الحماها؟ البنات كلهم سكتو .. كوثر قالت ليها تعالي يانور ..
ساقتها معاها .. قالت ليها مالك في شنو ؟.. وحموك الاكل ليه ؟ نور قعدت تبكي وماقدرت تجاوب ..
بس قالت ليها والله يا امي انا ماعملت حاجة .. انا كنت ساكتة ومؤدبة زي ما وصيتيني ..
قالت ليها خلاص حتاكلي معاي انا ..قالت ليها ياماما خليني .. انا ماعايزة ..
عارفه يا امي .. انا كنت عايزة ادي واحده من البنات (شبس) .
امها حمتها تشيل مني !!!
كوثر فهمت طوالي الحاصل ..وسكتت وقالت ليها ولايهمك يانور ..
ونور حست انها هي فيها حاجة غلط .. بس هي شنو ؟ ماقادرة تفهم ..
والسؤال ده حاضرها حصار شديد.. والموقف اثر فيها تاثير مبالغ فيهو .. وبقت تقول لنفسها ياربي انا غلطانة في شنو؟
(( انتي ماغلطانة يانور .. والغلط الحاصل انتي ما مسؤولة عنه .. ولكن يظل السؤال كبيرا" وعملاقا" .. !! على من تقع المسؤولية ؟؟
على من تقع مسؤولية هذا الاحساس المر الذي تملك هذه الطفلة؟))..
مرت الايام والشهور .. ونور تزداد جمالا" وكالا . وادبا" وبتصلي وتدعي كتير بتقول ياربي وريني انا بت منو ؟ .. انا نفسي اشوف امي مرة واحدة ..
في يوم كان عندهم رحلة للمدرسة .. ولما مشت الرحلة كان في مدرسة تانية
عندهم رحلة في نفس المكان ..
في الرحلة جات نفس البت الكان امها منعتها تاخد الشبس من يد نور ..
ونادتها وكلمتها بي كلام ..
ونور لمن شافت البت البت دي .. فرحت شديد وقالت هدي فلانة انا ح اسألها .. اليوم داك امها قالت ليها شنو عني ؟
وليه منعتها تشيل مني الشبس ..
وبقت تتذكر في اسم البت دي منو عشان تناديها .. وتسألها ..
وفعلا البت دي اليوم داك امها كان حكت ليها السر والسبب .. ونور .شكلها الليلة حتكتشف الحقيقة المرة .. تابعو معاي ..
...........................................................................................................................................................................................................
المسؤولية ..
الحلقة العاشرة
بقلم طارق اللبيب..
نور الصغيره ..اتذكرت انو البنيه اسمها هديل .. مشت عليها ..قالت ليها ياهديل ازيك .. هديل صرت وشها ومدت قدوما وقبلت منها كدا .. نور مشت للاستاذة بتاعة ناس هديل .. قالت ليها .. يا استاذة سلام عليكم .. الاستاذة قالت ليها .. عليكم السلام حبيبتي انتي منو؟ .. قالت ليها انا نور .. من طالبات المدرسة التانية النازلين هناك ديلك هم .. قالت ليها .. اها عندك سؤال؟
قالت ليك عاوزه منك مساعدة .. الاستاذة شايله ليها زمزمية بتكب في موية ..ختت الزمزمية والكباية واقبلت على نور بكل انتباه ..
وقالت ليها عيوني حبيبتي قولي احكي في شنو؟
قالت ليها .. الطالبة الاسمها هديل دي . بتبقى لي .. بس جيت اسلم عليها صرت مني وشها وابت ترد لي السلام ..عايزاك تسأليها قدامي.. انا غلطانة في شنو؟ عشان اتأسف ليها واعتذر ..
طوالي الاستاذة كوركت تعالي ياهديل ..
هديل جات الاستاذة قالت ليها مش البت دي بتبقى ليك ؟
قالت ليها لا .. ماعندي بيها اي علاقة .. الاستاذة قالت لي نور .. اها يانور انتي غلطانة معناها هي قالت مابتعرفك ..
قالت ليها مستحيل يا استاذه .. انا متأكدة انها بتبقى لابوي ..بس ماعارفة كيف ..
وانا كنت في بيت خالتها في السماية ولاقيتها هناك ..أسأليها ..
قامت هديل قالت للاستاذة ..بحكي ليك يا استاذة بس ماهسي ..
قامت الاستاذة قالت لنور دقيقة يانور.. افهم منها الحاصل شنو. وبقول ليك ..
نور مشت وقفت بعيد، مربعة يدينها وبتعاين للبت تحكي للاستاذة ،ونور بتعاين للاستاذة وشها اتغير وملامحها اتبدلت .. وبقت تتكلم مع البت بي زعل ..
بس ماعرفتهم بقولو في شنو؟.. لكن حست بانو الموضوع خطير ..
نور خافت انو الكلام يكون متعلق بالحاجة الحكاها ليها ابوها .. وخافت انو البت دي امها تكون حكت ليها حاجة عارفاها .. وبقت تقول معقول يكون الناس عارفني اني ماعندي ابو ولا ام؟
احتمال يقولو انا مسروقة !! وبقت ترجف من الخوف .. بس انتظرت الاستاذة عشان تعرف بالضبط الحاصل شنو؟
الاستاذة جات.. قالت ليها البت دي ماعندها اي موضوع يانور .. وتعالي سلمي عليها عادي .. واتونسي معاها .. والاستاذة مشت .وقعدت مع زميلاتها الاستاذات .. وبقت تحكي ليهم في كلام وبتأشر على نور .. نور عرفت انو الكلام عنها .. الاستاذات بقو يعاينو لنور باستغراب ..
جات نور قعدت جنب هديل .. وقالت ليها ياهديل انا غلطانة في حاجة ؟
قالت ليها ماعارفة .. قالت ليها احكي ليا ياهديل .. امك قالت ليك عني شنو؟
قالت ليها مابقول ليك .. امي قالت لي ماتتكلمي .. والاستاذة زاتها قالت لي ماتقولي ليها كلام زي ده ..
نور طوالي مشت للاستاذة تاني.. قالت ليها يا استاذة انا قلت ليك تساعديني وانتي ماساعدتيني .. شكرا" ليك انا ماشة ..
الاستاذة بقت تعاين لي نور بمشاعر غير معروفة .. والاستاذات متوجمات ومهجومات وبعاينو لي نور بنظرات غريبة لامن البت اتعقدت ومشت خايفة ..
وما استمتعت بالرحلة ديك نهائي.. كل الرحلة هي سارحة وبتعاين لناس المدرسة التانية .. البقو ماعندهم موضوع غير انهم يتوسو مع بعض ويعاينو لي نور
والمشكلة انها هي بت ذكية وبتفهم ..
وعاينت لي هديل قاعده مع الطالبات صاحباتها و تحكي ليهم برضو ..
ونور بقت طول الرحلة خايفة ومرعوبة انو يجي زول يخطفها .. وبقت تتمنى لمتين الرحلة تخلص عشان تمشي البيت ..
استاذتها لاحظت عليها خوف وقلق وتوتر .. قالت ليها انتي يانور مالك؟ في حاجة؟ ..
نور قالت ليها يا استاذة انا حاسة اني عيانة .. وفعلا" نور كترة الخوف والتوتر جاب ليها حمى .. !!!
(ويظل السؤال قائما" على من تقع المسؤولية؟) من المسؤول ؟؟
من المسؤل عن هذا العذاب الذي تواجهه هذه البريئة؟؟
قريب نهاية الرحلة كدا جات جات بت من مدرسة ناس هديل .. وقعدت جنب نور .. وقالت ليها صحي انتي (بت حرام ؟) ..
نور قالت ليها هديل قالت ليكم كدا ؟ قالت ليها ايوه كلمت البنات .. قالت انك بت حرام ولقيطه..
نور قالت ليها .. ماعارفة والله .. الا أسال أبوي ..
نور كانت مفتكره انو بت حرام معناها (مسروقة) .. وطول الطريق وهي راجعة على البيت من الرحلة .. بتقول بس ابوي قال انو المراة ادتو نور براها .. وهو ماسرق سرق نور منها .. طيب احتمال المراة تكون سارقاني من امي .. والناس عارفين .والله أنا ماعارفة ..طيب .. بس لو وروني امي منو ؟
هسي بتكون ماعارفاني انا وين؟ وبتكون بتبكي ..
انا لازم اسأل ابوي يوديني للمراة الجابني منها ..
وطبعا ياجماعة نور الان تمت العشرة سنوات وداخلة في الحداشر وبقت تفهم شوية شوية .. بعض الاشياء ..
وبتشاهد في المسلسلات .. حكايات الحمل الحرام .. وابناء السفاح وغيرها ..
ودرست في المدرسة عن الموضوع .. بس كانت مستبعده انها تكون معنية بالموضوع ده.. واول مرة تسمع لفظة (بت حرام) وماكانت عارفة معناها بالضبط شنو؟
ومصممة تسأل ابوها عن تسأولات كتيرة..
مع انها كانت بتتحاشا تفتح الموضوع مع امها وابوها ..
أها لمن وصلت البيت استحت تسأل ابوها .. قالت لو سألت ابوي بزعل وبقول نور متهماني بالسرقة احسن اسكت ..واسال زول تاني ..
طيب بكرة الصباح في المدرسة مشت سألت واحدة صاحبتها اسمها (تماضر) .من الصف التامن .ونور في الوكت داك . كانت في خامس .
وكانت البت دي بتحب نور شديد ودايما بتسأل منها ونور بتثق فيها شديد ..
ودايما" بفطرو مع بعض .. اها قالت ليها يا تماضر شنو يعني لو قلت الزول ده ولد حرام؟
وطبعا" تماضر زولة فاهمة وواعية يمكن 13 سنة أواكتر ..
قالت ليها عارفه ..ود الحرام ده يانور .. يعني زول ولدته امو بالحرام بدون عرس . ويمكن برضو تكون معرسه لكن جايباهو من راجل غير راجلا .
وده بكون ملعون. وكعب شديد . وبكون مضر وشرير .. عشان كدا الزول لمن يعمل حاجة شريرة بقولو ليهو ود حرام . بس انتي بتسألي ليه؟؟
قالت ليها طيب ياتماضر لو الزول مسروق من اهلو .بقولو عليهو ود حرام برضو؟
(شوف بالله نور وذكاها) .. تماضر قالت ليها ..لالا.. بس ود الحرام هو الوالدنو بالحرام ..
داك بقولو مسروق او مخطوف ..
وبي الاجابة الاخيرة دي ..نور انلاشى جواها الامل في انها تكون بريئة من التهمة ..
وخلاص عرفت انو هي في عيون الناس شنو بالضبط .
وضلمت الدنيا في وشها وعيونا كبتو
...........................................................................................................................................................................................................
المسؤولية ..
الحلقة 11 .
بقلم طارق اللبيب ,,
مدة الحلقة ست سنوات ,,
نور الصغيرة رجعت البيت وكانت متوترة ومستاءة استياء غريب لدرجة انها بطنها طامة وعندها حمى .. واول وصلت استفرغت شديد .. ولمن الليل جاء كانت درجة حرارتها فوق الاربعين ..
وامها خافت عليها شديد.. وقامو ودوها الدكتور بالليل وهي ماقادرة تتكلم ..
والدكتور قال ماعندها اي حاجة فحوصاتها نضيفة ..
احتمال اكلت حاجة مانفعت معاها او انو ارهاق عادي صرف ليهم فايتمين وبس
نور وصلت البت نامت طوالي واكوثر كل مرة تقوم بالليل تلمسها عشان تشوف الحمى نزلت منها ولا لا ..
بكرة الصباح قامت كويسة من الحمى ..لكن ساكتة ووشها متغير ..وحاسة انها هي ما نور المعروفة .. وبقت تنظر لنفسها بنظرة تانية خالص ..
وقبل ماتلبس للمدرسة دخلت لغرفتها وبقت تعاين لروحها في المراية كتير ..
وتقول معقول انتي يانور كدا ؟؟ خساااااااااااارة ..
طلعت برة واتشجعت تسأل ابوها من حاجة ؟
جاتو قالت ليهو يا بابا انا عايزة اسألك . وشكلها زعلانة كدا ..
قال ليها اسالي سريع انا مستعجل .. قالت ليهو .. صح انا بت حرام؟
امها جوة في المطبخ لمن سمعت السؤال الصحن الشايلاهو في ايدها وقع منها ..
وابوها اتهجم .. ونطط عيونو .. وقال ليها تعالي هنا القال ليك كدا منو؟
حكت ليهو كلام هديل النشرتو في الرحله..
وقالت ليهو .. انا تماضر صحبتي قالت لي بت الحرام ..
هي المولوده بالحرام .. واهلها جدعوها ماعايزنها .. وقالت بتكون ملعونه وشريرة ..
محمد قال ليها .. نووووور يانور .. بس انتي ماشريرة انتي طيبانة وصلايه وبتحبي الخير للناس .. عشان كدا اكيد انتي مابت حرام .. انتي بت حلال ..بس احتمال امك وابوك يكون حاصل ظرف وما قدرو يتكفلو بي معيشتك .. خافو علي تموتي بالجوع .. عشان كدا ادوك للمرا ..
قالت ليهو طيب . ام هديل قالت كدا ليه؟
قاليها بالمناسبه ام هديل دي ماعندها اي فكرة عنك . بس عشان اناكلمت حبوبتك . قلت ليها نور امها وابوها غايبين
وام هديل سمعت بالكلام افتكرتك كدا .بعدين هديل وامها اصلا كذاباات وشريرات.. انتي بتصدقي ابوك ولابتصدقي الكذابين والشريرين . قالت ليهو بصدق ابوي .. ابوي مابكذب نهائي. بكره الكذب كمان.
قالليها .انتي بت حلال زي سيدنا موسى بالضبط ..وحيجيي يوم وتلاقي امك وابوك .. بس انتي صلي وادعي كتير..
نور اطمأنت شديد بكلام ابوها .. وقربت عليهو باستو وقالت ليهو انا بحبك شديد يا بابا .. بس يا بابا انا عايزة اسألك سؤال ..
لو يوم ابوي وامي جو .. انا لو قلت ليهم ماماشة معاكم انت بتقيف معاي ..
لاني بالجد انا ماعايزة ام غير ماما ولاعايزة بابا غيرك ..
قال ليها بالتاكيد يانور في النهاية الراي برجع ليك انتي .. وانا معاك في كل صغيرة وكبيرة ..
ونور زال عنها هم كبير بكلام محد ورجعت تضحك ومبسوطة من جديد ..
وازدادت التزاما وطيبة .. وبقت اي وكت فاضي عندها .. بتقرا قران وبتسبح .. ليه؟
طبعا" عايزة تقنع نفسها ونفسياتها انها بت حلال .. عشان كدا هي طيبة وماشريرة ..
حتى في المدرسة البت البتغلط عليها هي بتعفاها وبتسامحا وبتحسن ليها
ولمن تتصرف تصرف زي ده .. تقول لنفسها انتي كدا بت حلال يانور ..
في اليومين ديل ظهرت اعراض حمل عند كوثر والدكتور أكد الموضوع ..
والخبر انتشر والناس فرحو شديد ..
ومرت الايام والشهور والسنين وفي فترة ستة سنوات حصلت حاجات كتيرة .. كوثر جابت بتين تومات ..ونور مافرحت في حياتها زي فرحتها بالتومات الجديدات ديل .. وكوثر ابدا" ما اهملت نور مع مشغوليتها بالتومات .. ونور ماشة كبيرة وماشة فاهمة وزايدة جمال وبهاء ونور .. والالتزام بالدين .. مواظبه على دروسها . وفي الاجازة وقتها كلو قرايه في كتب السيرة والفقه .. واي درس في المسجد نور بتكون حافظاهو صم.. لانو مكرفونات الجامع مسموعات في البيت بوضوح ..ومرت السنوات ونور تحتمي بربها من سوء حياتها .. وناس الفتيحاب لايعلمون شيئا عن تاريخها ,,وطيلة الفترة دي كانت عايشة في سلام داخلي .. ومستواها الاكاديمي ممتاز جدا ..
وسبحان الله كل ماتفكر في حياتها وتتضايق ..تجري تمسك المصحف تقرا ليها جزء تحس بي فرحة وأمان .. وتنسى كل همومها .. لغاية مابقت تحب القران اكتر من اي شي في الدنيا .. ودخلت الثانوي ..
ونور ماحصل زارت ناس حبوبتها ام امها ولا ام ابوها .. الايوم وفاة والدة كوثر قبل كم شهر ربنا يرحمها .. ونور بكت عليها شديد لانها كانت بتحب نور شديد ..
غير كدا تاني مامشت نهائي بس نادية وهادية احيانا بجو في بيت اختهم
بلاقوها وبحبوها برضو وما محسسنها باي غربة
لكن غير كدا اي زول من الاسرتين يكون جاي في البيت.. نور بتدخل تختفي من الانظار ..عشان ماتسمع كلمة تعكر صفوها.. خصوصا" اهل محمد ناس كعبين شديد .. ونور مابتظهر في اي مناسبة .. وعايشة عزلة تامة .. بس شغالة قراية .. وبتتكلم براااحة وهادية ورزينة .. ونضيفة وحلوة وطاعمة غايتو البت دي مكملة الكمال لله ..
والان نور في تانية ثانوي ماشة تالتة واخواتها الاتنين بقرو في الروضة ..سامية وسمية ..
نور عمرها 17 سنة .. بس الزول مابقدر يعاين ليها مرتين .. من الجمال الفوقها ..
اي زول يشوفها بتجيهو خلعة ويصاب بشلل حسي .. ويغلبو يعبر ..
بس الحمد لله هي مابتطلع نهائي الا للمدرسة ..
اها يوم الاستاذة قالت ليها يا نور انتي فتنه والله .. لمن تجي خاشة المدرسة الشارع كلو بقيف على حيلو .. انتي المفروض تتنقبي .. كدا بتعذبي الناس حرام عليك ..
ماهي ردة فعل نور على كلام الاستاذة دي
...........................................................................................................................................................................................................
المسؤلية ..
الحلقه 12
بقلم طارق اللبيب..
نور اتعاملت مع كلام الاستاذة بي جديه .. ومشت البيت كلمت ابوها انها عايزة تتنقب .. وابوها وافق على الموضوع ...
بس كوثر قالت ليها يانور يابتي الدين مافي النقاب .. الدين في القلب ..
نور قالت ليها .. بس ياأمي الدين في القلب وفي النقاب ..
والايمان هو ماوقر في القلب وصدقة العمل .. يعني يا امي .. هل ممكن الزول يخلي الصلاه ويقول الدين في القلب مافي الصـلاة؟؟
قالت ليها خلاص يانور .. عارفاك بتمنطقيني ..
بس يانور هسي لو اتنقبتي .. البشوفك منو عشان يعرسك بعدين ..
نور قالت ليها يا امي دي امور مقدرة تقدير الهي .. والزول قسمتو مابتفوت منه مهما كان ..
نحن نعمل الصح ونخلي الامور على الله .. نعمل العلينا وربنا مابقصر معانا ..موش كدا يا بابا ..؟
ابوها يعاين ليها معجب بيها شديد .. وبي فهمها وادبها وطريقتها في الكلام . والاسلوب البتتكلم بيهو مع امها .. ويتبسم .. قال ليها اكيد يانور .. اكيد..
قال ليها بكره وانا راجع ..بجيب ليك الخمارات الكاسية وكبيرة ..والنقابات وكل شي.
..التومات جن جاريات من جوة .. بكوركو .. نور نور نور ..
وجن الاتنين كبسن عليها حضنوها ..
وهي سلمت عليهم .. بكل محبة وقالت ليهم جبت ليكم سمسميه ..
ودايمن لمن تطلع بتجيب لاخواتها هدايا ..
وبنومن التلاتة في سرير واحد .. من كان عمرهن تلاتة سنة ..مرتبطات بينور ارتباط شديد ..
في استاذ في مدرسة ناس نور اسمة عادل . استاذ تربية اسلامية ..
ومن الاساتذة الجديدين . وزول ملتزم شديد .. دايما" نور بتسأله من المسأئل والاشكاليات البتواجها ..وهو زول عندو اخلاق ماشاء الله ..
الزول ده بحب نور نور ومتيم بيها جداجدا .. طبعا" نور اي زول في المدرسة متيم بيها ..
مدرسة شنو ؟ حتى الفي الشارع وناس الدكاكين .. وستات الطعمية ..
اي زول بشوف نور بجن فيها .. ولمن يشوف طريقة تعاملها وكلامها .. وابتساماتها
بزداد جنون .. ماتعرف تحبها بي شنو ولاشنو ..
الجمال . الادب . التدين . الذكاء . الشطارة . المواظبة .على الدروس .النظافة .
وبحكم انو استاذ عادل بعرفها شديد من السنة الفاتت ..
وعارف اخلاقها واهلها وامها وابوها . والليلة كمان جات المدرسة منقبة . واستاذ عادل من مناصري النقاب .. خلاااااااااااااص جنا جنا .. بقى يدخل ويمرق ويضحك ويتبسم زي العندو ام فريحانة ..(دي مرضة بتخلي الرول يقرقر بلا سبب) ..
استاذ عادل نوى جواهو .. انو البت دي تكون شريكة حياتو ..
وجاء اتكلم مع استاذتها قال ليها .. انا مجنون بي البت الاسمها نور دي شديد ..
وشدة مابحترمها ماقادر اصارحها .. عايز بس اشوفها رايها فيني شنو ..
وباقي الكلام لي قدام .. لانها البت دي نجفة ..وخايف يجي واحد اخو بنيات يخطفها يخلي خشمي حنضل حنضل ..
الاستاذه قعدت تضحك ..وقالت ليهو والله يا استاذ عادل انا قايلاك مابتعرف تقول الكلام ده .. والله يامولانا طلعت داهية وموية تحت التبن ..
بس زي ما انت شايف .. البت دي صغيرة لسه ..انا ماعارفة انت شفقان ومستعجل كدا ليه؟
قال ليها ماشاء الله ..البت فايرة وجسمها بيوهم انها اكبر من عمرها ..واي زول بشوفها بفتكر انها جاهزة .. عمرها ده عارفو انا وانتي .. عشان كدا انا خايف تفوت مني ..
الاستاذة قالت ليهو ابشر يا استاذ عادل .. ماعندك مشكلة انا بكلمها ليك ..
اها في نهاية الحصص .. الاستاذة نادت نور وقالت ليها :
ماشاء الله يانور ..النقاب يتمنى عليك .. وكلنا شكلنا حنتنقب .. والنقاب خلاك اجمل
وفي كم بت الليلة قالو عايزين يتنقبو ..وطبعا" من دعى الى هدى كان له من الاجر مثل اجور من تبعه لاينقص ذلك من اجره شيئا" ..
نور قالت ليها الحمد لله .. الاجر الاول والاكبر ليك يا استاذتي .. انتي الوجهتيني ..
قالت ليها الله يحفظك يانور . انتي اية من ايات الله .. يانور .. انا عايزة اقول ليك موضوع .. رايك شنو في استاذ عادل ؟
طوالي نور الذكية طوالي فهمت .. دنقرت واتبسمت وقبلت كدا ..
وقالت ليها نعم يا استاذه .. استاذ عادل زول غدوة وممتاز .. (وبيني وبينكم نور زاتا معجبة باستاذ عادل شديد عشان ملتزم ومتدين)..
الاستاذة قالت ليها خلاص يانور انا عرفت ردك .. موش ياهو ردك كدا ؟؟
نور قالت ليها انتي يا استاذتي تأمري .. وانا اطيع ..
الاستاذة مشت كلمت استاذ عادل .. قالت ليهو :يا استاذ عادل .نور طلعت مكسرة فيك ههههههه..
حاول اتكلم مع اهلها سريع..
قال ليها .. اصلو ماممكن .. اصلو مابصدق .. وشال الجك كب ليهو تلات كبابي موية شربها .. ههههه الزول ده مفروم فرم .. والله يامولانا الله يعينك ..
قال ليها اسمعيني يا استاذة ..
الليلة الاربعاء انا بكرة بسوق ناس البيت وامشي اطلبها رسمي
عشان اثبتها وبعدين مامستعجل ..
استاذ عادل عمرة 26 سنة فقط ..وهو من الاساتذة الصغار .. وزول مهذب وخلوق
ابوهو تاجر مشهور . في سوق امدرمان . وعندة 4 اخوان اكبر منه ..
اتنين مقاولين واتنين شغالين مع الوالد في السوق ..
وعندو اختين اصغر منه .
وامه انسانه من النساء النادرات .. وهم من اسرة معروفة في امدرمان .
وليهم تاريخ معروف ..
استاذ عادل مشى جمع اسرتو .. وسريع سريع كلمهم بي البت .. وبي اهلها
واخلاقها ودينها ..
وابوهو طلع بعرف اهل محمد ..وكان زمان صديق لي عم من اعمام محمد
ابوهو وافق طوالي ..وقال ليهو ديل ناس معروفين ..انت تقبل طوالي ونحن مستعدين نمشي معاك .. واحتمال نعقد ليك على البت طوالي ..
بس طبعا" نور ماكلمت ابوها ولا امها بكلام الاستاذة .. باعتبار انو استاذ عادل لسسه ما اتكلم معاها كلام رسمي ..
ياربي الوضع ده حتكون نتيجتو شنو؟..
...........................................................................................................................................................................................................
المسؤليه .
الحلقة 13
بقلم طارق اللبيب ..
يوم الخميس الصباح .نور حكت لكوثر كلام الاستاذه .. كوثر قالت ليها .. بتكون قاصدة شنو يانور؟ .. احتمال عايزة تمهد ليك انو الاستاذ حبديكم دروس خصوصيه . في الاجازه . لانك السنة الجاية ممتحنة الجامعة . وعايزة تعرف رايك في الموضوع . نور قالت ليها احتمال يا امي .. بس انا حسيت من كلام الاستاذه .زي الكانها بتطلب راي فيهو كزوج .
امها فقع فقع .. فقعتها ضحكة .. قالت ليها دايما البنات البكونو في عمرك ده ..تفكيرهم كلو في العرس. يابت هوي انتي بت متين؟ .. انا زاتي مابخلي بتي تعرس صغيرة كدا .. نور حبيبتي . والله انا لغاية الليله ماشبعت فيك شوف.. وانتي قاعدة معاي وانا مشتاقة ليك . واكتر حاجة مطيرة نومي ..بعدين لمن تعرسي وتمشي مني. انا حيكون حالي كيف بعدك ؟ ..
نور كانت واقفة قعدت جنب كوثر في السرير وختت يدها في كتفها وقالت ليها .. امي حبيبتي انتي يا الغالية .. انا مستحيل ابعد منك مهما كان ..
كوثر قالت ليها انتي الليلة لازم تتأكدي من الاستاذة .قالت كدا ليه .
قالت ليها حاضر طيب يا امي ..
نور لمن مشت المدرسة مالقت الاستاذة قالو الليلة عيانة .. واليوم يوم الخميس..
اها في اخر اليوم .. استاذ عادل لاقى نور ..
ودار الحوار بينهما الاتي ..
عادل قال ليها السلام عليكم يانور ..
نور : عليكم السلام يا استاذ عادل ..
استاذ عادل ..كيف حالك انا مبسوط جدا لانك اتنقبتي يا نور ..
نور قالت ليهو : ربنا يزيدك فرحة يا استاذ .. وده لانك انت بتحب ربنا وبتحب الطاعات ..
قال ليها يانور أنا الليلة جاييكم زيارة معاي ناس البيت .. بنجيكم المساء
نور قالت ليهو .. الف مرحب بيكم انت واهل بيتك يا استاذ ..
نور لمن قال ليها كدا حست قلبها عمل شححححححح ..
لكن برضو عملت فيها عادية وما ارتبكت ابدا" .
ودعها ومشى.. وهي لمتين تصل البيت.. عشان تكلم امها بالموضوع لانهم مابكونوا مستعدين يستقبلو ضيوف ..
المهم وصلت البيت وكلمت امها .. امها انزعجت جدا"
وقالت ليها .. هي هي عان ده؟ شكلو جادي .. بالمناسبة ده استاذ غريب ..
كيف يعني يكلمك في نفس اليوم .ويقول ليك نحن جايين الليلة ..
طوالي ضربت تلفون لمحمد قالت ليهو اغشى جيب معاك فواكه وحاجات نحن جايينا ضيوف المغرب ..
محمد ماسال من الضيوف من هم وكم هم .. جاب المسلتزمات الوافرة وجا .
اول ما وصل كوثر حكت ليهو.. ارتبك جدا.. واول مرة يظهر عليهو خوف زي ده .
قال ليها ديل ناس معروفين.. واسرة من الاسر العريقة في امدرمان
..ونحن في مشكلة حقيقة يا كوثر ..
الناس ديل طبعا" ماعارفين عن نور اي حاجة ..
كوثر قالت ليهو نور مالها ياخوي هينة ولاهينة؟ .. هم لاقنها وين؟ .. سماحة وادب وشطارة .. قال ليها انا بقصد الموضوع داك ..
قالت ليهو مافي اي موضوع ..والله تفتح خشمك بي كلام انا تاني لابيني لابينك ..
في اللحظة دي نور كان ماشة على الحمام سمعت طرف من الكلام ..
جات قالت لامها.. بس يا امي كدا حرام .. وده الخداع بي ذات نفسه ..
ونحن لو عايزين الموضوع ده يكون مليان خير وبركة.. لازم نكون صادقين في كل كلمة ..
انتي مش قلتي لي لو ما مرقك الصح الكضب مابمرقك ..؟
كوثر قالت ليها هوي انتي اسكتي بس الموضوع موضوع اهلك الكبار ماتدخلي ..
نور سكتت ومشت .. بس مارضيانة بالموضوع ..
محمد قال لي كوثر انا مابسكت ياكوثر ولازم نقول الحقيقة ..ومشى ..
اها الجماعة بالمساء جو .. وحق الله بق الله اكرموهم ..
ابو عادل طوالي فتح الكلام .. قال ياجماعة باختصار بدون مقدمات وتكاليف ..
نحن عايزين بتكم نور لعادل .. وهو استاذها وعارف عنها اي شئ ..
وباختصار اكتر نحن ماعندنا حاجة اسمها خطوبة وكلام فارغ .. عايزين
نعقد ليهم هسي .. محمد قال ليهو .. بس ياحاج في موضوع مهم ..
الحاج قال ليهو لاموضوع مهم ولاغيرو .. نحن حانعقد والموضوع نتكلم فيهو بعد العقد ..
في اللحظة دي جات واحدة في التومات قالت لابوها .. بابا نور عايزاك ..
لمن محمد جا لي نور .. نور قالت ليهو .. عليك الله يا ابوي نادي لي استاذ عادل ..
ابوها قال ليها خلاص .. الناس ديل بقو جاهزين للعقد ومنعوني اقول اي حاجة ..
وماعارف اعمل شنو يانور وخجلان اتكلم وخايف ومرعوب ..
قالت ليهو ماتخاف من حاجة يا ابوي .. نحن ماعاملين حاجة غلط .. احكي ليهم بالحقيقة ..
كدا ربنا بغضب مننا .. الغش مابيرضي ربنا ..
قال ليها خلاص لحظة .. انا انادي ليك استاذ عادل .. وانتي احكي ليهو ..
مشى محمد قال للحاج .. ياحاج نور بتي عندها كلام مع عادل قبل العقد ده طلبها ..
ارجوكم اخرو العقد ده شوية ..
لغاية مايتكلمو مع بعض وبعدين اعملو الحاجة العايزنها .
الحاج قال ليهو هوي يامحمد .. ما تخليني ازعل منك .. انا زعلي كعب خلاص .
نحن عايزين نعقد عايزين نعقد .. لو عندك كلام انت وبتك خلوهو لبعدين ..
محمد قال ليهو .. معليش ياحاج حتى لو زعلت .. العقد مابتم قبل ماتتكلم نور مع عادل ..
الناس كلهم صنننن اتهجمو من كلمة محمد .. لانو الحاج ده مافي زول بقول ليهو كدا .. الدنيا كلها بتعمل ليهو حساب .. بس محمد اصلا مابعرف الخوف .. خاصة في موضوع بتعلق بي سلامة نور ورغبتها ..
الحاج قال ليهو خير يامحمد .. مافي مشكلة .. ياعادل امشي شوف البت عايزة تقول شنو؟
عادل دخل على برندة كدا.. وجاتو نور .. قالت ليهو يا استاذ عادل..
في كلام مهم انا عايزة اقولو ليك .. وماعارفة اقولو كيف .. محرجة شديد والله .. وقلبي حاسة بيهو ح يتقلع من مكانه . وفي نفس الوقت محرجة شديد ..
قال ليها خير يانور في شنو قولي ماتخافي ..
في زول في حياتك؟ .. قالت ليهو ابدأ يا استاذ .. مافي انسان اعز علي منك .. لكن انا مابستحقك .. قال ليها كلامك ده حيرني شديد .. انتي يانور اغلى من الدهب والالماظ .. وانتي اكتر طالبة انا بحترمك .. وبحترمك اكتر من الاساتذة ..
قالت ليهو ده لانك مابتعرف عني شي..
قال ليها طيب قولي .. قلقتيني شديد يانور . الحاصل شنو..
قالت ليهو يا استاذ عادل . لازم تكون عارف انا مابت محمد .. وديل ما أهلي الحقيقيين ..
ديل ناس صالحين ربوني وبس .. انا مامعروف اهلي ولا امي ولا ابوي ..
قال ليها يعني يانور انتي لقيطة؟؟؟؟؟؟؟؟؟ ..
قالت ليهو عليك نوووووووووووووور .. يا استاذ..
...........................................................................................................................................................................................................
المسؤليه ..
الحلقه 14
بقلم طارق اللبيب
لمن عادل سمع كلام نور . واتاك من المعلومة .. حسه بانو عندو لفة راس .. وحاجة في راضنيهو تسوي . شووو شووو .. قعد في الواطة وخت يديهو في راسو .. وحصلت عليهو حالة تحصل على العدو ..
ياخي الزول ده بعد قعد في الواطة على كرعيهو غلبو .. اتفرجخ .. ( تخ كدا) .. بالجد لانو الزول ده فرح بي نور فرحة ماحصل فرحها في حياتو ..
ودي صدمة مابعدها صدمة وماكان متوقعها ابدا"
وبقى يسوي .. لاحول ولاقوة الا بالله .. لاحول ولاقوة الا بالله ..
ونور واقفة تعاين ليهو ..بعد جمع اعصابه شوية .. قال ليها .. سبحان الله يانور .. ماقادر اصدق والله ..
قالت ليهو يا استاذ استغفر الله العظيم .. وقوم من الارض ..الكون ده ماشي بتسيير رب العالمين.. ونحن مافي يدنا حاجة نغير من التصريفات الالهية ..
المهم انا جيت اكلمك عشان ماتصلك المعلومة بعد فوات الاوان ..
بعدين حتى لو مافي حاجة زي دي .. المفروض العقد ده الليلة مايتعمل اصلا" .. لانو كدا الناس بتتضايق ومابتلقى فرصة تشيل نفسها ..
ثم انو بعد الكلام القلتو ليك ده .. انت ماتديني راي هسي .. امشي ودور الكلام في راسك .. وشوف عواقبو .. على المدى البعيد .. وشاور ناس البت وانا منتظراك .. طول الزمن لغاية ما ترجع ..
استاذ عادل قام من الارض .. ونفض جلابيتو كدا .. وقال ليها بس انا برضو عايزك يانور .. دي حاجة مابيدك .. نور قلبها عمل فررررررر من الكلمة دي .. فرحت فرحت فرحت .. قال ليها ابشري يانور .. ان مابقدر اخليك .. ومشى على ناس ابوهو في الديوان ..
قال ليهم ياجماعة نور قالت العقد الليلة مايتعمل .. لانها مصرة انو اعمامها وخيلانها يكونو حاضرين .. وانا موافق على كلامها ..نحن الليلة ..نعمل الخطوبة ونؤجل العقد لغاية الخميس البعد الجاي ..
الناس كلهم قالو على خيرة الله .. على خيرة الله .. واتونسو شوية وقامو مشو ..
وطول الطريق وهم راجعين .. استاذ عادل ساكت ومبهوت بهتة غريبة ..
ابو هو واخوانو الاتنين اتكلمو ..
الابو قال ليهم انتو ماشايفين الاستاذ ده من دخل على العروس جانا مارق متغير؟
واحد من اخوانو الكبار قال ليهو فعلا" والله يا ابوي الزول ده البت دي قالت ليهو شنو ..
التاني قال : إتلقي شاكلتو قالت ليهو : ليه تكلفتوني كدا ؟ تعملو العقد والخطوبة مع بعض ؟ ليه .. ؟
استاذ عادل قال ليهم لمن نصل البيت بوريكم قالت لي شنو؟
قالو ليهو اهو وصلنا البيت يا استاذ ..
قال ليهم تعالو .. وامه ساااااكتة لاقالت خير لاقالت شر ..
بعد دخلو جوة اول شي اتكلمت امه قالت ليهم .. انا نظرتي في الناس مابتخيب ..
البت العيني شافتها دي .. من الله خلقني ماشفت سماحتها .. ادبها . وتربيتها ..
ياريت بناتي يكونو زيها ..
ابوهو قال : اتكلم ياعادل في شنو؟ وقالت شنو؟ عندها فينا راي ؟؟؟
استاذ عادل قال ليهم : نور قالت انها هي مابت محمد .. يعني محمد ما ابوها ونور ما امها .. والبت دي مجهولة النسب .. لقيطة جايبنها من الملجا ..
الناس ديل صنننننننننننننننننننن .. قريب الدقيقة ماتسمح الا صفافير الجندب ..
ابوهو قال .. لاحول ولاقوة الا بالله .. ده حظ شنو ياعادل ياولدي ..
اول ماتفكر تعرس .تقع ليك في بت حرام؟ .ودي زاتو عرسها حرام سخط في الدين..
طوالي نرفضها ونفسخ الخطوبة دي الليلة قبل بكرة .. اتاريهو محمد مرتبك وماعارف يقول شنو؟
عادل قال ليهو .. ماصح يا ابوي الكلام ده ..
اول حاجة الأصل في شريعتنا أنه: {لا تزر وازرة وزر أخرى}، وأن: {كل نفس بما كسبت رهينة}، وأنه: "لا يجني والد على ولده"، فهذه البنت لا ذنب لها فيما جنى أبواها؛ حتى نحاسبها عليه ونعاملها على أساسه، فإذا كانت ذات خلق ودين فلا حرج في الزواج بها، ولعلها إن شاء الله تكون خيراً من كثيرات نشأن بين آبائهن وأمهاتهن، ونور ومثيلاتها .ليست هي ممن يحرم نكاحهن.
وهذا اجماع بين الائمة والعلماء ..
ابوهو قال ليهو طيب كيف نواجه الناس انو زوجنا ولدنا بت حرام .. واليسوى والمايسوى يتكلم فينا ..
قال ليهو نحن ناس عاقلين وفاهمين .. المفروض مانشتغل بي كلام الناس مادام
انو الموضوع شرعيا" جائز .. ونحن ماعملنا حاجة ممنوعة في الدين ..
ابوهو قال ليهو طيب .. موض من حق ابناءك انك تختار ليهم ام يفتخروا بيها بين الناس
وكيف يواجهو الناس بعدين انو امهم بت حرام ؟؟
قال ليهو يا ابوي ليه انت مصر انها بت حرام ..
في كتير من الاطفال بكونوا في دار الايتام . وهم ما اولاد حرام .
مرات يكون مخطوف . او مسروق . مرات يكون اتخلصو منه لمجرد الشك وحاجات كتيرة انت عارفها يا ابوي ..
وفعلا ياجماعة .. استاذ عادل كلامه صحيح ميه في المية ..
كثير من الناس لأول وهلة يسمون اللقيط هو ابن الزنا ..كما سمى والد عادل ..
وأنه لا أهل له ولا عشيرة، وهذا خطأ لاحتمالات كثيرة . لأن اللقيط هو مولود طرحه أهله خوفا من العيلة والفقر أو فرارا من التهمة. فقد يكون له أبوان ولكن دفعتهما أسباب قاهرة إلى إلقائه عسى أن تمتد إليه يد رحيمة تتولى أمره. وقد يكون تركه اهله لاسباب غير الزنا من ضمن هذه الأسباب ما يلي :
· أن يكون الولد ثمرة زواج عجزت الأم عن إثباته، وخشي الطرفان من التهمة لعدم توفر بعض شروط العقد الصحيح وهو ما يعرف في الفقه الإسلامي بـ (النكاح الفاسد). كأن لم يرض به ولي المرأة أو تم بدون شاهدين أو غير ذلك من صور العقد الفاسد، أو تم الزواج مخالفا لنظام البلد بدون مستند يثبت هذا الزواج.
· أو يكون من إفرازات ما يسمى زواج المسيار الذي يتم بالسر ويشترط الطرفان أو أحدهما عدم الإنجاب ، فإذا حدث الحمل حدثت المشكلة ثم السعي لحلها بالتخلص من الولد خشية التهمة، وتبعات إفشاء سر الزواج التي ستنعكس على الطرفين دون التفكير في مصير هذا الطفل.
· قد يكون الولد مسروقا وهو في المهد في غفلة من أهله؛ بقصد الإيذاء أو لغرض الاستغلال أو لعدم إنجاب الأطفال، ثم ندم الفاعل وخشي أن يكشف أمره فيتورط، فألقاه في مكان ما تخلصا منه.
· قد يكون الأب مصابا بمرض الشك تجاه زوجته مما يجعله يتهمها في طفلها ويخشى أن ينسب إليه ظانا أنه من غيره، فيتخلص منه بتركه في مكان ما، ثم يدعي موته وهو في الحقيقة ابنه الشرعي.
· قد تكره الزوجة زوجها كرها شديدا بسبب فساده وانحراف أخلاقه أو إيذائه لها فتفارقه وهو لا يعلم بحملها. وعندما تلد فإنها لا تتقبل الطفل وتكرهه امتدادا لكره الأب، فتتخلى الأم عن طفلها في حالة لا تشعر فيها بمغبة تصرفها عندما تسلمه للأب وهو لا يعترف به فينكره ويتخلص منه بتركه لا سيما وهو منحرف ولا يبالي بما يفعل.
· قد تمرض الأم مرضا مزمنا مع عدم وجود العائل وضيق الحال وكثرة الأطفال فتتركه في المستشفى.
· أن يكون الطفل ثمرة شيخ طاعن في السن من امرأة صغيرة، وهذا مستحيل في نظر أبنائه فيتهمون زوجة أبيهم بهتانا بينهم وبين أنفسهم ويخشون أن ينتسب المولود إليهم ويقاسمهم الإرث، فيتخلصون منه بطريقة مدبرة بإلقائه في مكان ما ويدعون موته.
·أو أن يترك الطفل لسبب آخر غير الأسباب التي ذكرت كأمثلة فقط ، وغيرها كثير وغامض وفي غاية التعقيد حيث يصعب حصره.
الابن غير الشرعي (ابن الزنا) : هو المولود نتيجة لقاء محرم بين رجل وامرأة لا يربطهما عقد نكاح شرعي، وفي هذه الحالة لا يحكم على المولود من هذا اللقاء إلا إذا أثبت ذلك شرعا ، وتكون أمه معروفة، أما والده في الغالب فغير معروف .
المهم .. ان نعرف انه ليس كل لقيط هو ابن حرام ..
يلا هنا عادل انهى كلامه .. انه قالت ليهو اسمع يا استاذ سيبك من الفلسفة والكلام الفاضي .. البت دي ياهي يا انا ... لو عايز تتزوجها انا ما امك .. وماعافية منك دنيا واخرى ..
.
ابوهو قال ليهو وانا كمان ياعادل ما رضيان بالزواج ده ابدا" .. شن رقد الله بلا الحريم ..
وليه نحن ندخل في معمعة زي دي ..
والاخوان الاتنين لهم نفس الراي وكل المنطق العلمي لاستاذ عادل ما افاد بشئ ..
وكلهم قاموا منه خلوهو قاعد براهو في الصالون بتاع الضيوف ..
ولايزال السؤال ضخما" ..
....................................................................................................................................................................