محمد علي الامي: مابخاف من شي

مابخاف من شئ

محمد علي الأمي

مابخاف من شئ برضي صابر
المقدر لابد يكون
ان أتاني الهم جيشه دافر
يلقى ياخلاي صبري وافر
يلقى عزمي التام ليه خافر
ويلقى قلبي شجاع وما جبون
بالعداء معروف ما ببادر
ومابخون الجار ماني غادر
وما بقول للناس متلي نادر
بل بقول للخالق شؤون
ما عصيت مولاي ماني فاجر
لا ولا بالعالم بتاجر
نفسي يا أحباب ليها زاجر
لم أكن كل يوم لي لون
الثبات معروف لي معاصر
لو بقيت في داخل معاصر
والإله غير شك لي ناصر
رغم انف الواشي الخؤون
قول لشاهد الزور فيما ساير
هدي روعك قبل الخساير
ياما قبلك عميت بصاير
من لساني وقولي الهتون
قول لأهل الجور والمساخر
مافي أول ما ليهو آخر
مابدوم العز والمفاخر
وما بدوم الظل والحصون
عن سبيل الحق ماني نافر
وما جحدت الخير ماني كافر
وما ضمرت السوء ماني حافر
للصديق هاويات السجون