الشاعر الفنان عثمان خالد
رحلة عيون
ننساك .. ؟
هو إنت بتتنسي .. ؟
ما إنت روحنا وحبنا
سافرنا في عينيك ولسه
قلوبنا فيك متجننه
* * *
ولقينا في دنيا العيون
يا اصبى من النور غنا
كون من رشاقه وأمسيات ..
لوحات أنيقه ملونه
ذابت قلوبنا عليك حنان
وانت في عيون ذوبتنا
ننساك .. ؟
هو انت بتتنسي .. ؟
ما انت روحنا وحبنا
خلينا في عينيك قلوب
مشدوهه بيك .. متجننه
* * *
يا اغلى من نور العيون
شايلاك قلوبنا هوى وحنان
اتوسد الأعماق ..
وغنى الكون
في ارجوحة جنان
دغدغ خيالنا.. وشيلنا
حلق بينا فوق عمر الزمان
خلينا من خمرة خيالنا
السامي نرشف .. نحتسي
ننساك ... ؟
هو انت بتتنسي .. ؟
ما انت روحنا وحبنا .. !
* * *
غار المسا .. والكون صبح
عشاق جمال يتأملوا
وكل الحروف الفي الخيال
بي لهفه جادو وما غلو
وحتى القمر حوله النجوم
التفوا فيك يتغزلوا
وقالوا الجمال يا غالي بيك
كانت نهايته واولو
ونحنا ف هواك يا بهجه
لا بنطيق بعاد .. لا بنحملو
اصلو المحبين الحنان
لا بنسوا ... لا بتحولوا
موضوع: عثمان خالد .. رحلة عيون 
الأحد أغسطس 02, 2020 10:04 am
